Acoli Bible Revision
Jabuli 10
Lega pi lar ki i cing jo maracu
Pingo icung cen kamabor, Ai Rwot?
Pingo ikane woko ikare me can?
Jo maracu giwake ma gidwaro lucan me aneka;
mi yub ducu maracu ma guyubuni aye otyekgi.
Dano marac nyate pi mitine maracu matye i cwinye;
dano ma wor ma mito ni enong magoba yeto Rwot dok kwere woko bene.
Dano marac bedo ki cwiny me wake kun waco ni, “Lubanga peke.”
En pe paro, dok pe bino bot Lubanga.
Gin marac ma en tamo ducu tiyo dok cobe kakare.
En pe niang i ngolo kop pa Lubanga pien tye lamal tutwal;
en neno lukwore ci jwiyogi woko ajwiya.
En tamo ki i cwinye kun waco ni, “Gin mo peke ma biloya;
ikare me kwona ducu pe abineno can.” 1
Loke ducu opong ki ceno dano acena, wa ki bwola ki bura me diyo dano tektek;
en pe gale me loko lok marac ki lok makelo adagadaga.
En kane woko i dye gangi kakiyo piny;
en libo dano ci neko jo ma gipe ki bal.
En neno piny kun roto dano ma can omako adada ma piny oloyo;
en kane woko i mung kakiyogi calo labwor.
En kane woko pi kiyo lacan wek emak woko,
en mako lacan nongo dong oleko wiye okelo omoko i obwone.
Dano ma can omako adada en nginyo woko, macalo lee ma tekone peke, pien teko pa lakwore nongo oloyo mere woko.
Dano marac tamo ki i cwinye ni, “Wi Lubanga dong otyeko wil woko,
dok omiyo wange woko, pe bitwero nena.”
Bin ilara do, Ai Rwot!
Wii pe myero owil ikom ngat matye ki can, Ai Lubanga!
Pingo dano marac kwero Lubanga,
kun tamo ki i cwinye ni, “Lubanga pe bipwoda?”
Ento in ineno, dok ingeyo can ki cwercwiny ma dano tye kwede,
kare ducu i tye ma i yube me miyo kony.
Dano matye ki can miyo kwone boti,
pien in ikonyo lutino kic.
Myero itur twero pa jo maracu ki lutim maracu woko;
yeny balgi ducu nio wang ma pe dong ibinongo balgi mo kadi ki acel.
Rwot en aye Rwot Lubangawa ma bedo nakanaka;
lurok ducu ma giworo lubanga mukene gibito gitum woko ki i lobone.
Ai Rwot, ibiwinyo lega pa jo mamwol;
ibimiyo gibedo ki tekcwiny,
dok ibiciko iti pi winyogi.
Ibingolo kop pa lutino kic ki pa jo ma kiunugi,
wek dano mo me lobo man pe dok okel lworo ikomgi.
Source notes (1)
- Cross-reference Rom 3:14
Acoli Bible Revision. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · Public domain · SourceEdition imported 2026-11-09.