Jabuli 9

Wer me pwoyo Lubanga pi ngolo kop atir

1Abipaki, Ai Rwot, kun amiyi pwoc ki cwinya ducu,

abitito pi jami me auragu ducu ma itiyo.

2Abiwero wer ki yomcwiny kun anyate piri.

Abiwero wer me pako nyingi, in Ngat Mamalo Twal.

3Lukwora giloke gidok cen ka guneno in ituc;

gigate gipoto piny gito woko.

4In langolkop ma ngolo kop atir,

ibedo iwi komkeri,

ci ingolo kopa kakare.

5In ijuku lurok, dok ityeko jo maracu woko liweng;

ityeko jwayo nyinggi woko ducu,

pe dong kibipo ikomgi matwal.

6Lukwora dong gutum woko matwal;

ijwero gangigi woko ducu,

wi dano dong otyeko wil woko ikomgi adada.

7Ento Rwot en rwot ma bedo iwi komkere nakanaka;

en ocibo komkere pi ngolo kop.

8En loyo lobo ki kit ma atir,

ci ngolo kop pa lwak me rok ducu

kun ngolo kop atir.

9Rwot en kalare pa jo ma piny obwoyogi,

en cel matek ma gwokogi maber ikare me ayela.

10Rwot, jo ma ngeyi gibiketo gen gi ikomi;

pien in pe ibwoto jo ma gibino boti.

11Wuwer wer me pak bot Rwot, matye kaloc i Cion!

Wutuc gin ma en otiyo bot lwak me rok ducu!

12Pien Lubanga ma lacul kwor me remo poo pi jo ma can omakogi;

wiye pe wil ikom kokogi,

dok pwodo jo ma timogi rac.

13Kica omaki ikoma do, Ai Rwot!

Nen kit atwom ma jo ma gidaga gutyeko keto ikoma!

In aye ma ilara ci i ila malo ki i to,

14wek imiya acung inyim jo Jerucalem,

wek atit botgi gin ducu ma omiyo apako nyingi.

Abibedo ki yomcwiny pien dong ilara.

15Lurok gukwinyo bur ka dok gupoto iye keken gi;

guciko obwo ci tyen gi ken gi aye omoko iye.

16Rwot dong otyeko miyo nyinge ongene pi ngolo kop atir,

jo maracu gimoko i owic pi tim ma gin aye gutimo.

17Agiki pa jo maracu ducu en aye to,

gin lurok ducu ma gikwero Lubanga.

18Jo ma piny obwoyogi pe kibiwekogi ata kare ducu;

ki gen pa lucan bene pe birwenyo woko matwal.

19Bin, Ai Rwot! Wek dano pe oloyi!

Lwong lurok gucoke inyimi wek ingol kop ikomgi.

20Ai Rwot, mi lworo omakgi;

wek gunge ni gin dano adana mamwa.