Jabuli 12

Lega pi kony

1Konya, Ai Rwot,

pien ngat mo maber ma geni dong peke;

dok jo ma lugen dong gurwenyo woko ki ikin dano.

2Dano acel acel loko lok goba bot lawote,

ma nongo lok ma a ki idoggi mit ata ento cwinygi opoke woko i dul aryo.

3Rwot, myero ijuk lok me bitagi woko,

en lok ma a ki idoggi me nyateni!

4Gin giwaco ni, “Wabiloyo lok ki lok dogwa,

wabiloko gin ducu kit macalo wamito,

pien pe tye ngat mo ma en ladit ma loyowa.”

5Rwot owaco ni, “Ento kombedi dong abibino,

pien dong kiyako jami pa lucan woko,

dok jo ma piny obwoyogi gitye kacur acura ki arem.

Pimeno dong abigwokogi kit ma gimito.”

6Lok pa Rwot ma en ciko ber, kitwero genone,

obedo calo ryal ma kiliyo maber ki mac,

ma kiliyo tyen abiro kulu.

7Gwokwa maber kare ducu, Ai Rwot,

gwokwa ki ikom yalwak me kare man.

8Jo maracu gitye kawire i kabedo ducu kun giyenyo dano,

kit macalo dano ducu pako kwede tim marac ma gitiyo ikin dano ma i lobo.