Carolok 11

1Rwot dag jo ma gipimo jami ki mijan ma pe pimo kakare, ento cwinye yom ikom jo ma gitye ki mijan ma pimo jami kakare.

2Awaka kelo lewic; ento jo mamwol gitye ki ryeko.

3Jo ma cwinygi atir leng cwinygi telogi, ento jo ma gin lubal ma kitgi racu gito gitum woko.

4Ikare me akemo pa Rwot, lonyo doko gin ma konye peke, bedo ki kit ma atir aye twero laro dano ki ito.

5Dano ma pe ki bal mo, ma kite atir, woto i yo mapwot, ento ngat marac poto i peko pi race.

6Kit ma atir pa jo ma cwinygi tye atir twero larogi, ento lubal giloke gidoko opii me bal ma gitimo pi tamgi maracu.

7Ka dano marac oto, ci gene bene tum woko cut, ki gen pa dano ma pe ngeyo Lubanga pe cobe.

8Dano ma kite atir kilaro ki i ayelayela, ento dano marac poto mere i can.

9Jo ma pe gilworo Lubanga gibalo luwotgi ki lok doggi, ento jo ma kitgi atir gibwot pi ngecgi.

10Jo ma i gang ducu gibedo ki yomcwiny, ka dano ma kite atir olimo gum odoko lalonyo; ka inen jo maracu aye guto, jo ma i gang ducu giwoo ki twon yomcwiny mo ma pe twere.

11Gum ma jo ma kitgi atir gilimo miyo gang doko dit, kun jo maracu gibalo meggi gang abala ki lok ma giloko.

12Dano ma wiye oding cayo lawote acaya, ento dano matye ki niang matut ling mere alinga mot.

13Ngat ma woto ki lok me kwot ikin gang tucu mung woko, ngat ma lagen aye kano lok me mung.

14Kace ineno rok mo pe tye ki dano mo ma telogi maber, ci rok meno poto woko; bedo ki jo mapol ma gin lumiitam kelo kuc ki bedo maber.

15Ngat ma cike me culu banya pa dano mo ata bikoko angee, ngat ma kwero cung pi cul macalo meno bedo mere mot ki kuc labongo lworo mo.

16Dako maber ma lakica dano giworo, ento dako ma kite rac bedo ki lewic.

Jo ma luwackom gibedo lucan, ento jo ma lubwami ginongo lonyo.

17Dano ma lakica limo kony pire kene, ento dano mager keto ret ikome kene.

18Dano marac nongo mucara me bwolo, ento dano ma kite atir limo mere mot me ada.

19Ngat ma omoko liking ibedo ki kit atir bibedo kwo, ento ngat ma mede kitiyo gin marac bito.

20Rwot dag jo ma tamgi ongak, ento cwinye yom ikom jo ma gipe ki bal mo.

21Myero wuniang ni, dano ma latim marac kibimiye can, ento jo ma kitgi atir keken aye kibilarogi.

22Dako manen mwonya maber, kace pe romo poko kin gin maber ki marac, nongo rom ki agit jabu ma kirwako i um opego.

23Jo ma kitgi atir gimito megi jami maber keken; tam pa ngat marac tum mere i akemo.

24Jo mogo ma gimiyo limgi kit ma cwinygi opwoyo, gilony gimede ameda; jo mukene gikano limgi akana ma pe gimito miyone, ci gidoko lucan marac.

25Dano ma cwinye yom imiyo mot kimedo lonyo madwong bote, ngat ma konyo jo mukene en bene kibikonye.

26Dano giceno ngat ma kano kal woko ma kun nongo kimito, ento kilamo gum ikom ngat ma cato bel botgi.

27Ngat ma tame tye me nongo gin maber, dano gipwoye; ento ngat ma yenyo gin marac, nongo bene gin marac cut.

28Ngat ma geno lonyone, bipoto; dano ma kite atir bedo mere ki kwo maber macalo yat ma pote dyak.

29Ngat makelo ayela ikom jo ma i ode pe binongo gin mo matwal, ki ngat ma laming bibedo latic pa dano maryek.

30Ngat ma kite atir limo kwo macalo adwogi me bedone atir, dong bedo labongo lubu cik rwenyo kwo pa dano arwenya. 311

Kace dano ma kite atir kitwero miye mot ikare ma nongo en pud tye i lobo kany, ci jo maracu kacel ki jo ma gin lubalo kibipwodogi bene!