Carolok 12

1Dano ma ye pwony nongo maro ni ebed ki ngec mo, ento ngat ma kwero pwony nongo ming.

2Rwot bedo ki yomcwiny ikom dano ma kite ber, ento en ngolo kop loyo latim marac.

3Dano pe cung matek pi timo gin marac, ento dano ma tiyo gin ma atir bedo calo lwit yat ma odonyo matut i ngom ma ngat mo pe romo putune.

4Dako makwiri ma kite ber miyo dano keto woro ikom cware, ento dako ma kelo lewic bedo calo bur adola mudet ityen cware ma ogudu cogo.

5Tam pa ngat ma kite atir tye kakare ma rwate ki cik; lok ma jo maracu giyubu bwolo dano abwola.

6Lok ma dano marac loko kelo to, ento lok pa ngat ma cwinye atir laro dano.

7Jo maracu kityekogi woko ducu pe mo dong, ento jo me dogola pa dano ma kite atir birii nakanaka.

8Dano maryek matye ki ngec jo gipwoyo, ento gicayo ngat ma tame ongak.

9Dano mabedo ki mwolo ma tiyo tic wek enong jami me gwoko kwone, ber kato ngat ma poro bedo dano madit ma nongo pe tye ki ginacama.

10Dano ma kite atir gwoko lee matye i pacone maber, ento jo maracu giketo gero ikom leegi labongo kica mo.

11Ngat ma lapur matek twero limo cam mabup; ento ngat ma balo karene itimo tim ma konye peke nongo en ngat ma ryekone peke.

12Jo ma kitgi racu giyenyo mere yo me timo bal keken, ento jo ma kitgi atir gicung gigi matek liking.

13Dano ma latim marac ki make ki lok me bal ma en loko, ento ngat ma kite atir bwot ki i ayela ducu ma opoto ikome.

14Dano twero yeng ki jami mabeco ma en limo pi lok ma en loko, dok tic ma dano tiyo kicule bene pire.

15Dano ma laming tamo ni gin ma en etiyo ducu tye atir, ento dano maryek winyo mere tam ma kimiye.

16Ka kiniga omako laming kingeyo woko cut, ento dano maryek jalo yet ma kiyete kwede.

17Ngat ma lagen tito lok me caden matye ada, ento caden ma lagoba tito mere lok goba me bwola keken.

18Lok pa ngat ma loko lapera winye malit macalo pala lucwan ka ocobo dano, ento lok ma a ki ileb ngat maryek twero cango dano.

19Lok goba rii pi kare manok keken, ento lok ada bedo matwal.

20Jo ma giyubu lok me tiyo gin marac aye gikano lok me bwola i cwinygi, ento jo ma gitamo me tiyo gin maber gibedo ki yomcwiny.

21Pe tye gin mo marac matwero poto ikom ngat ma kite atir; ento dano marac nino ducu nongo mere ayelayela keken.

22Rwot dag jo ma giloko lok goba, ento cwinye bedo yom ikom jo ma gitiyo ki gen.

23Dano matye ki niang matut ling gire mot kadi en ngeyo gin moni, ento jo ma gin luming ginyutu kwiya pinygi kamaleng bot dano.

24Dano ma omiyo kwone me tiyo tic matek bedo ki twero me loyo luwote, ento ngat ma lawackom kibikete katiyo tic muroni mapek.

25Par mapol gengo dano me bedo ki yomcwiny, lok maber me kica aye romo kweyo cwinye.

26Dano ma kite atir miyo tam mabeco bot luwote, miyo pe gitiyo gin marac, ento yo pa jo maracu ngako luwote miyo girweny arwenya.

27Dano ma kome wac pe nongo gin ma en mito, ento dano ma tiyo tic matek twero bedo ki lonyo mabup.

28Bedo ki kit ma atir tero dano i kwo, ento lubu yo me bal tero mere dano i to.