Carolok 13

1Latin maryek winyo pwony ki juk pa wone, ento latin ma langala pe winyo lok ma kijuke kwede.

2Jo ma kitgi beco gibilimo mot pi lok mabeco ma nongo giwaco; miti pa jo ma lubal tye mere me timo tim bwami keken.

3Ngat ma gwoke i lok ma en loko gwoko kwone; ento ngat ma loko lok ata, can poto ikome cut.

4Ngat ma lawackom kadi bed cwinye omito jami moni marom mene pe twero nongone, kun dano ma omiyo kwone me tiyo tic matek kimedo bote lonyo ameda.

5Dano ma kite atir dag goba, ento dano marac timo tim me lewic ki cac me bwola keken.

6Kit ma atir gwoko ngat ma pe ki bal mo, ento bal tyeko jo maracu woko atyeka ducu.

7Jo mogo giporo bedo ki lonyo, ma nongo pe gitye ki gin mo kadi ki acel; ki jo mukene giporo bedo lucan ma kun nongo gitye ki lwak lonyo madit ata.

8Dano ma lalonyo twero koko kwone ki lonyone; ento ngat ma lacan, ma gire mo peke, pe tye ki par pien ngat mo peke ma buru kwone.

9Jo ma kitgi atir gimeny calo mac tara ma lyel maleng, ento jo maracu gibedo calo mac tara matye kato atoya.

10Wake kelo peko keken, ento jo ma giwinyo lok me tam ma kimiyo botgi gibedo maryek.

11Lonyo ma kinongo oyotoyot i yo marac rwenyo woko, ento ngat ma nongo lonyo ma manoknok pi tice matek lonyone bimede.

12Gen ma pe ocobe kakare turu cwiny dano, ento miti ka ocobe kakare tye macalo yat me kwo.

13Ngat ma cayo lok ma kiwace lwongo to ikome kene, ento ngat ma lubu gin ma kiciko bilimo mot.

14Pwony ma jo maryek gipwonyo ki dano miyo kwo, miyo dano bene gibwot ki i owic me to.

15Ngec ma dano tye kwede miyo jo mapol gipwonye, ento jo ma pe gene gilimo meggi can keken.

16Dano ma wiye tiyo cobo tice ki ngec ma oromo, ento ngat ma laming bedo ka nyutu mingone kamaleng.

17Lakwena marac miyo dano gilimo peko, ento lakwena ma gene kelo kuc.

18Dano ma kwero juk nongo can ki cwercwiny; ento ngat ma ye juk dano giworo.

19Ka dano onongo gin ma en mito yomo cwinye mada; ento jo ma luming gidag bwoto tiyo gin marac.

20Ngat ma bedo kacel ki jo maryek pwonye doko ryek bene, ento ngat ma mako lurem ki luming kite bibale woko.

21Gin marac lubu lubalo i kabedo ducu ma giwoto iye, ento jo ma kitgi atir kibimiyogi jami mabeco macalo bakacicgi.

22Dano ma kite ber weko lonyone bot likwaye macalo ginaleyagi, ento ngat ma labal kano mere lonyone pi ngat ma kite atir.

23Poto okang pa lacan ceko cam mabup, ento jo ma kitgi pe atir gikwanyo came woko ki tim ma pe atir.

24Dano ma pe pwodo latine ki odoo nongo pe mare, ngat ma maro latine keto cwinye me pwode ka nongo obalo.

25Ngat ma kite atir bedo ki cam ma oromo, ento dano marac kec neko kare ducu.