Carolok 14

1Mon maryek miyo pacogi bedo maber ki kuc, ento mon ma luming aye giketo pacogi woko aketa pi mingogi.

2Dano ma kwone tye atir aye lworo Rwot, ngat ma yone ogom ma maro timo gin marac cayo Rwot acaya.

3Lok pa laming calo odoo ma kigoye kwede, ento jo maryek lok ma giloko twero gwokogi.

4Kama pe kipuru iye ki twoni dyang, inongo bel peke iye, ento kama kipuru iye ki twoni dyang i nongo cam cek madwong ata.

5Ngat ma lagen tito lok me caden matye ada, ento caden ma lagoba tito mere lok goba me bwola keken.

6Langala pe twero doko ryek wa ki acel, ento ngat matye ki niang matut twero nongo ngec oyotoyot.

7A woko ki bot laming, pien pe tye lok mo me ngec ma en romo pwonyi kwede.

8Dano maryek tye ki niang matut me nongo kit ma myero ebed kwede, ento luming mingogi telogi i yo marac miyo gin bwole abwola ken gi.

9Lubanga cayo jo maracu, ento timo kica ki jo ma cwinygi atir.

10Yomcwiny ma itye kwede bedo meri keni; ki keccwinyi bene meri; pe tye dano mo matwero nywako gin gu ducu kwedi.

11Kibibalo ot pa dano marac woko, ento ot pa ngat ma cwinye atir bicung mere kakare. 121

Tye gin ma dano tamo ni en aye yo ma atir, kun nongo yo ma kit enu tero en ito.

13Kadi bed ineno dano nyero nyero, kine mogo nongo cwinye bene tye kacwer; ka yomcwiny dong otum, ci ingeye bino cwercwiny madit.

14Jo ma kitgi racu gipoto ican pi gin marac ma gitimo, ento jo ma kitgi ber gilimo mere mot maber pi gin maber ma gitiyo.

15Dano ma laming ye jami ducu ayeya, ento ngat maryek kong ngiyo kakwene ma en cito iye.

16Dano maryek wiye po loke ci kwero timo gin marac, ento dano ma laming tiyo oyotoyot labongo par maromo juke.

17Dano ma kinigane lyeti oyotoyot timo gin me mingo, ento dano matye ki ryeko diyo cwinye.

18Lukwiya piny gilubu yo me mingo, ento jo maryek kimiyogi mot me bedo ki ngec.

19Jo ma lutim maracu giryebe piny inyim jo ma kitgi beco kun gikwayo kony ki botgi.

20Pe tye ngat mo ma mito dano ma lacan, kadi wa jo ma inget ganggi kikome, ento jo ma lulonyo gitye ki lurem mapol.

21Ngat ma cayo lawote en labal; ngat ma kica mako ikom lacan bedo ki yomcwiny.

22Jo ma gibedo ki tam me timo gin marac gingak woko adada. Ento jo ma gitye ki tam me tiyo gin maber kigenogi dok bene kiworogi.

23Kit tic ducu ma dano tiyo magoba tye iye, lok aloka keken ki dog kelo can.

24Bedo ki ryeko kelo lonyo, ento tim me mingo medo mingo ameda.

25Caden me ada laro kwo pa jo mapol, ento caden ma loko lok goba nongo laroro.

26Dano ma lworo Rwot bedo ma cwinye opye, dok lutinone bene ginongo kama gilare iye.

27Lworo Rwot miyo kwo bot dano, miyo dano bwot ki i owic me to.

28Deyo pa rwot tye pi lwak dano mapol ma en loyogi; labongo dano rwot pe gin mo.

29Ngat ma kiniga pe mako oyot tye ki niang matut, ento ngat ma kiniga mako oyot nyutu mingone keken.

30Ka dano bedo ma cwinye opye, miyo kome bene bedo yot; ento nyeko tye macalo bur adola ma odet ma ogudu cogo.

31Ngat ma unu dano ma lacan meno yeto Lubanga ma ocweyo danoni; ento ngat ma bedo ki kica ikom jo ma piny obwoyogi nongo woro Lubanga.

32Dano marac can poto ikome pi time marac, ento dano ma kite atir nongo kalare pien bal mo peke ikome.

33Ryeko bedo i tam pa dano matye ki niang, ento luming pe gitye ki ngec mo ikom ryeko.

34Bedo ki kit ma atir miyo rok moni nyinge ywek matek, ento bal kelo lewic bot rok mo keken ma iwi lobo.

35Latic ma tiyo tice ki ryeko miyo rwot bedo ki yomcwiny: ento kiniga make ikom latic ma tiyo tic mamiyo lewic bote.