Carolok 10

Carolok pa Solomon

1Magi aye carolok pa Solomon.

Latin maryek yomo cwiny wone, ento latin maming cwero cwiny mine matek.

2Lonyo ma inongo ki tim maracu pe konyi, ento bedo ki kit ma atir twero lari ki ito.

3Rwot pe weko kec neko dano ma kite atir, ento en kwero dano marac miyo pe nongo gin ma iye mito.

4Ka in lawackom ci ibedo meri lacan, ento ka itiyo tic matek ci itwero lony.

5Ngat maryek coko cam woko ki i poto ka ocek, ento ngat ma nino mere anina ikare me kac kelo lewic iwiye kene.

6Rwot miyo gum ikom dano ma kite atir, dano marac mungu tim bwamine woko.

7Dano ma kite atir kipo pire pien en lakel gum, ento dano marac nyinge bibale woko, wi dano biwil woko ikome matwal.

8Ngat ma laryeko i cwinye twero lubu cik, ento dano ma laming ma loko lok me mingming agikine en aye can keken.

9Dano ma cwinye leng bedo labongo lworo mo, ento dano ma loko kite atata bingene woko.

10Dano ma bedo kamungu lok kun umu bal kelo ayela, ento ngat ma juku dano atir kelo kuc.

11Lok ma jo ma kitgi atir giloko en aye wang it me kwo, ento dano marac loko lok kun nongo omungu tim bwamine woko. 121

Adagadaga nyayo lweny ki mone, ento bedo ki mar umu bal ducu.

13Ngat ma nino ducu tye ki niang matut loko lok ki ryeko; ento dano ma wiye oding ka oloko lok mo, omyero ki miye mere pwod aye.

14Jo ma luryeko gilimo ngec ducu macalo gitwero, ento laming ka loko loke lwongo mere can me nyiko cok bote.

15Lonyo bedo calo gang matek bot lulonyo, ento lucan can nekogi aneka.

16Cul pa dano ma kite atir en aye kwo, ento magoba ma dano marac nongo en aye mede ameda ki timo bal.

17Dano ma winyo pwony tye kalubu yo ma tere i kwo, ento dano ma dag juk ngak mere ki yone pat.

18Dano matye ki adagadaga nino ducu loko lok goba keken, ngat maloko lok me kwoto luwote nongo en laming.

19Ka dano mo bedo kaloko lok madwong, ci twero timo bal i lok madwong ma en lokoni; dano maryek gire ling alinga.

20Ngat ma kite atir loke bene leng calo ryal ma kiliyo maber: ento tam pa dano marac konye nok tutwal.

21Dano ma kite atir pwonyo jo mapol ki loke ma en loko, ento luming gito atoya pi ding wigi.

22Ka Rwot omiyo gum, dano doko lalonyo; Rwot pe medo cwercwiny ikom gin ma en omiyo.

23Tiyo gin marac obedo calo gituku ki bot laming, ento dano matye ki niang matut nongo yomcwiny iryeko ma en tye kwede.

24Gin ma dano marac lworo mada bipoto ikome, ento dano ma kite atir kibicobo mitine.

25Kace yamo mager okodo, ci bayo dano marac woko cen, ento ngat ma kite atir moko bedo mere matwal.

26Pe myero icwal dano ma lawackom ni otii tic mo piri; pien tye calo kongo bwino mawac, dok calo yito ma duny donyo iwangi.

27Lwor Rwot ci ibirii iwi lobo pi mwaka mapol, ento dano marac mwakane me bedo i lobo bibedo manok.

28Gen pa dano ma kite atir kelo bote yomcwiny, ento gen pa dano marac lal woko ata.

29Rwot tye macalo cel gogo matek pa ngat ma yo me kwone tye atir, ento jo ma gin lutim maracu en bityekogi woko liweng

30Pe tye ngat mo ma bireto dano ma kite atir; dano marac aye pe bibedo i lobo.

31Ngat ma kite atir loko lok ki ryeko, ento ngat ma loko lok mungak me gobagoba kibingolo lebe woko.

32Ngat ma kite atir loko lok mabeco ma dano pwoyo bene, kun dano marac nongo loko mere lok mungak ma rwenyo dano arwenya.