Carolok 9

Ryeko ki Mingo

1Ryeko ogero ode, ci opayo wir abiro ocibo iye. 2En oneko lee pi karama me donyo iye, oonyo kongo bwinone, dok oyubu jami ducu oketo iwi meja. 3Dong ocwalo angecane ma gucito kalwongo dano ki i kabedo matye malo tutwal ma i gang madit, kun giwaco ni, 4“Wubin kany, wun jo ma pe wutye ki ngec!” Ki bot ngat ma wiye oding en waco ni, 5“Bin wucam kwona, dok wumat kongo bwino ma aonyoni. 6Wuwek kwiyapiny obedi, ci wubibedo kwo, dok bene wubibedo ki niang matut.”

7Dano ma mito ni ejuk langala, langala nywaro woko anywara, ki ngat ma mito ni ejuk latim marac, ci latim marac dok keto ret ikome. 8Pe myero ijuk ngat ma langala, pien miyo bikweri woko; juk dano maryek, ci bimari. 9Pwony dano maryek, ci ryekone bimede ameda; pwony dano ma kite tye atir ci en bimede ameda ki pwony meno. 101Ka dano lworo Rwot, ci cako nongo ryeko; dano ma ngeyo Ngat Maleng bibedo ki niang matut. 11Ryeko bimiyo nino me kwoni nya doko mapol; dok bimedo mwaka me kwoni, miyo irii i lobo. 12Kace iryek, ci in kikomi aye ma ibinongo bere; ento ka ibedo langala, ci meno bene biketo peko ikomi keni.

13Mingo obedo calo dako ma laming, ma lawoo tutwal; calo dako ma latarwang ma pe lewic mako. 14En bedo idogolane, nyo i kabedo mamalo matye i taun, 15ci cako lwongo jo ducu ma gikato ki kenyo, ma nongo gitye kawot me cito anyim i yoo wotgi ni, 16“Ngat matye ki ngec manok myero oloke obin kany!” Bot ngat ma wiye oding en waco ni, 17“Pii akwala lim matek, ki kwon ma icamo imung bene yomo cwinyi mada.” 18Ento jo macito bote pe gingeyo ni jo ducu ma gicito bote gito woko, jo ma gucito bote ducu guto kiyikogi i lyel.