Carolok 8

Pak pi Ryeko

11

Pe wutye kawinyo ka ryeko dange matek,

ki niang matut bene mito ni ki winy dwone?

2Iwi cere ducu ma inget yoo

nongo en ocung i angakangaka yoogu ducu.

3Idog cel ma kidonyo kwede i gang,

en tye kadange ki idog gang matek tutwal ni,

4“Wuwiny, atye kalwongo dano,

lwongonani tye pi jo ducu.

5Wun jo ma pe wungeyo gin mo, wunong pwony wek wudok calo jo ma dong gutegi;

wun luming bene wuket cwinywu me niang.

6Wuwiny, pien gin ma abititoni obedo lok mabeco,

dok lok ducu ma abiloko bibedo lok atir;

7pien abiloko ada keken;

gin marac pe bikati ki idoga,

pien bedo me kwer ki tung bota.

8Lok ducu ma awaco tye atir;

pe tye mo ma kidwalo tere nyo ma ogom i loka.

9Loka ducu tye atir bot ngat matwero niang,

dok winye maber bot jo ma gitye ki ngec ma oromo.

10Wumak pwony ma apwonyowu kwede maka kwanyo lim,

dok wugam ngec maka kwanyo lonyo.

11Ryeko ber makato jami me welgu,

kadi ki jami mukene ducu ma cwinywu maro pe kiromo poro kwede.

12An ryeko, atye ki tam matut,

dok alimo ngec ki tam maber me moko lok.

13Ngat ma lworo Lubanga pe tiyo gin marac.

Wake ki nyate ki yo me tiyo gin marac

ki lok ducu ma kidwalo tere ma pe tye atir ducu cwinya daggi.

14Atye ki twero me miyo tam ki me keto yub ducu i tic,

atye ki niang matut dok atek.

15Luker ducu giloyo loc pi twerona,

dok pira miyo luloc giketo cik matye atir.

16Rwodi ma giloyo lobo giloyo pi kony mera,

ki ludito ducu ma giloyo lobo bene kitmeno.

17An amaro jo ma gimara,

jo ma gibedo kayenyo an ki cwinygi ducu bene gibinonga.

18Atye ki lonyo kacel ki deyo,

lonyo ma rii, ki kwo maber, ma abimiyo botgi.

19Gin ma amiyo botwu ber kato jabu,

kato kadi wa jabu mabere,

dok gin ma wulimo ki bota kato ryal ma kiliyo maber.

20Alubu kit matye atir,

en aye yo me ngolo kop kakare;

21amiyo lonyo bot jo ma gimara,

dok apongo odi me kano limgi ki lim madwong. 222

Rwot ocweyo an ryeko macalo acaki tice,

man aye obedo tice ma en otiyo ikare macon tutwal.

23Ikare meno macon kicweyo an kena,

i acaki piny kikome ma peya kicweyo lobo.

24Kinywala ma onongo nam maditogu bene pud gipeke,

dok wangit ducu bene onongo piine pud pe gunye ma kati woko.

25Kinywala ma onongo godi ducu pud pe ginen,

ki ceregu bene onongo pud gipeke;

26ma pud peya Lubanga ocweyo lobo ki poti ducu matye iye,

kadi ki apwa me ngom ma okwongo nen.

27Ikare ma en ocweyo polo onongo an dong atye,

ikare ma Rwot oketo agiki obedo tye idye nam madongogu,

28ikare ma en omiyo polo ocung i kabedone malo,

ka dok omiyo wang pii me nam madongo gucako gunye.

29Ikare ma en oketo kama nam myero ogik iye,

wek pii pe omol oket woko ata miyo balo gin ma en oloko,

ikare ma en oketo guti me te lobo ducu,

30an onongo atye, abedo kangete macalo ladiro tic.

Dok cwinye obedo yom kare ducu pi an,

an abedo ki yomcwiny madwong mada inyime;

31ma cwinya okwe pi bedo i lobo ma en ocweyoni,

dok cwinya obedo yom ikom lutino pa dano.

32Lutinona, kombedi wuwiny loka;

jo ma gitiyo gin ma awaco botgi aye gibedo ki yomcwiny.

33Wuwiny pwonya dok wubed maryek,

pe myero wubwot pwonye ata.

34Dano ma winyo loka bedo ki yomcwiny,

en dano ma bedo idog ganga nino ducu,

makura idogola me ganga.

35Ngat ma onongo an meno onongo kwo,

ci Rwot bibedo ki yomcwiny ikome;

36ento ngat ma pe onongo an biketo ret ikome kekene;

ki jo ducu ma gidaga nongo gimaro to.”