Carolok 7

1Latina, mak loka, dok ikan gin ma an aciki kwede ducu macalo lonyo madit. 2Lub cika wek ibed kwo, gwok lok ma apwonyi kwede kit macalo igwoko kwede wangi. 3Gwokgi maber kare ducu, coogi woko ducu i cwinyi. 4Myero iwac ki ryeko ni, “In lamera,” ki niang matut bene myero ilwong ni laremi ma imaro adada. 5Man bigwoki wek pe ibed ki tam ikom mon pa jo mukene, bimiyo iloyo tam pa dako ma lakwele, kadi bed loko lok mamit calo ango.

Dako ma lakwele

6Ikare ma ayabo wang dirica me oda, ci aneno piny wa ki iwang dirica me kicikana. 7Aneno lwak jo matino ma pe gitye ki ngec mo wa ki acel; aneno ikin jo magi matino, awobi mo ma laming atika. 8En obedo kawot ki i yoo kun kato ki itwok ot pa dako ma lakwele, kun lubu yoo ma cito i ot pa dako meno, 9wi otyeno, ma piny anga katoni, idyewor ma onongo piny dong col. 10Nen, dako mo orwate kwede, ma oruke calo lakwele kikome ma cwinye opong ki lok me bwola. 11En dano ma lewic pe make, lawot ata, kome pe ye bedo gang kacel; 12ka pud ineno tye kawot i gudu koni dok i neno nongo opile wa i cuk, itwok yoo ducu butu kuru piny. 13En oneno laco ci omwome omake woko liking, onoto leme, kun neno wange atir labongo lewic mo, ka owace ni, 14“Atyeko tyero gitum tin, dok tin acobo kwonga; 15kombedi an abino karwate kwedi, ayenyi ki cwinya ducu, ci dong anongi woko. 16Atyeko peto cuka iwi kitandana, bongo cuka ma rangigi patpat ma kikelogi ki i Ejipt; 17dok atyeko kiro moo mura ikom kitandana, akiro bene moo ma ngwece kur ki cinamon mamit. 18Bin, wek wabut kacel nio odiko ki mar keken; wek wabed ki yomcwiny pi mar ma watye kwede. 19Cwara tin peke paco; ocito woko welo iwot mabor. 20Omako lim ki kicaane ducu ocito kwede; en bidwogo paco kany ka dwe ogudu got.” 21Dakonu obedo kabito nyeri ki lwak lok gobagoba mapol ata; olo twal odiyo laco meno ki loke mapwoti. 22Cutcut nyeri otugi lubu kor dakonu, calo twon ma kipeyo kitero kanekone, 23nyo macalo til ma omoko i owic, nio ka atero ocelo cin iye otucu woko pil. Bedo calo winyo ma ringo laro i owic; en pe ngeyoni tim macalo meno bimiyo erwenyo kwone kulu.

24Kombedi wun lutino, wuwiny loka, wucik itwu maber kawinyo lok ducu ma kati ki idoga. 25Pe myero iwek cwinyi obiti me lubu kit kwo pa dakonu, pe ingak ilub kore. 26Dakonu oneko lwak co mapol ata; ada, jo ma en onekogi welgi pe kwane. 27Ode ma en bedo iyeni meno mere lyel, meno aye yoo ma tero dano i to.