Carolok 6

Lok me juk mukene

1Latina, ka in iye me cung pi lawoti, dok ka ijengo jamini pi dano mo ata, 2ci nongo loki ma ilokoni odoko owic piri, pien nongo kimako lok ki idogi. 3Pimeno latina, tim kuman, ci ibilaro kwoni; cit oyotoyot ibak dogi bote, pien kombedi dong i poto i cing lawoti. 4Pe myero inin, pe myero iwek nino bene omak wangi ma miyi yweyo matek; 5lar komi macalo til ma ringo laro kome ki bot ladwar, macalo winyo ma tuk woko ki i owic pa ladwar.

6In lawackom, nen kit ma nginingini tiyo kwede; mito kong ibed ki ryeko me neno kitgi. 7Pe gitye ki rwot mo, kadi ladit nyo laloc mo; 8ento giyubu cam me akana ikare me oro, dok gicoko wit cam mapatpat ikare me kac. 9In lawackom mono, ibibedo kabutu abuta pi kare marom mene? Ibico awene ki iwang nino? 101En waco ni, “Kong abut anin manok, dok adol cinga woko me miya yweyo.” 11Ento man bimiyo can maki kit macalo layak mako kwede dano, ma nongo oruke woko ki jami lweny.

12Dano marac, ma konye peke, woto mere atata ki lok me bwola keken, 13kun gayo dano ki wange, dok gwelo ki tyene, ka dong cimo piny atata, 14ma nongo en tye ki cwiny mungak mupong ki tam maracu keken, dok miyo en tubu dano teretere. 15Pimeno can bipoto ikome atura; pi kare manok keken ret bimake ma pe dong bicang.

16Rwot dag jami maromo abicel, tye jami abiro kulu ma gin ducu gin me kwer ki tung bote: 17en dag dano ma tamo ni eryek pire kene, ma loko lok goba, en bene dag jo ma gioyo remo pa jo ma peke ki bal. 18Rwot dag dano ma cwinye opong ki yub me timo gin marac, ki jo ma giringo oyotoyot katiyo gin marac. 19En dag bene caden ma loko lok goba, ki ngat ma tubu omegine.

Lok ma juku timo abor

20Latina, myero ilub gin ma woru otito boti, dok pe ibwot pwony pa meni. 21Ket lok magi ducu i cwinyi kare ducu; gwok lok magi macalo igwoko gin mo ma itweyo inguti. 22Lok magi gibiteli i woti; kadi ka ibutu piny bene gin bikuri ikom gin marac; dok ka ico ki iwang nino gibipwonyi kit ma myero ibed kwede. 23Cik tye macalo tara, ki pwony bene tye macalo ceng maryeny, dong pwony me yubu kit pa dano en aye yo me kwo. 24Lok magi bimiyo igwoke ma pe ibedo ki mon maracu, kun gwoki bene ki ilok me bita pa mon ma gin lukwele. 25Pe myero cwinyi opar pi bereni, dok pe iwek wange ma en neni kwede oywa tami. 26Laco mo keken twero wilo dako ma lakwele ki mugati acel ci bedo kwede, ento tim me abor twero balo kwo pa laco mabedo ki dako pa ngat mukene. 27Itamoni dano twero kwanyo mac keto ikore, ci mac pe wango bongone woko? 28Anga matwero wot i lodi mac ma tyene pe biwang woko? 29Ngat ma cito bedo ki dako pa lawote bene limo can kitmeno; pe tye ngat mo ma bwot ma pe kiketo can ikome, ka obutu ki dako pa lawote. 30Dano pe gicayo lakwo ka okwalo cam ma nongo kec neke kun mito eyeng. 31Kace kimako en lakwo meno, en biculu cul maromo wang abiro kulu; dok bimiyo jami ma i ode woko ducu pi cul. 32Dano ma timo abor nongo pe ryek; ngat ma tiyo gin macalo meno nongo tye kaneke kene. 33Dano gibiketo ret ikome dok gibicaye, dok cwercwiny me can ma en bilimo pe biwany ki i cwinye. 34Laco matye ki nyeko pi dakone bedo ki kiniga madwong, ma ka oero lweny ci neko dano cut, nongo pe ye juk. 35En pe biye kit cul mo kadi ki acel, dok kadi kimito wile ki lwak mot mapol, magi ducu pe twero juku kinigane.