Carolok 5

Lok me juku tim me abor

1Latina, ket cwinyi kawinyo lok me ryekona, cik iti bene kawinyo kit ma nianga tye kwede. 2Miyo ibingeyo kit kwo ma mite, dok lok ducu ma ibiloko binyutu ada ni kara i tye ki ngec. 3Dako ma lakwele mere kite enu, lok doge lim calo kic, nongo loke bene pwot kato moo woko; 4ento i agikine inongo doko kec macalo yat roka, ma nongo bit ryoryo calo pala lucwan. 5Dakonu biteri wa i lyel; yo ma en woto ki iye cito i to keken. 6En pe tye kalubu yo matero dano ikwo; tye kacabe atata ki kwone pe ngeyo gin matye katime.

7Latina, kombedi dong iwiny loka; pe myero iwek, dok wi pe owil ilok ma awaco. 8Pe icit bot dako ma lakweleni, pe icit cok ki dogolane. 9Ka icito bote, ci woro mayam kimiyo boti bidoko pa jo mukene, dok jo ma pe gin lukica gibineki woko ma nongo mwaka me toni peya oromo. 10Ji ata gibiyako lonyoni woko ducu, gin ma ibedo katic pire matek larok bitero woko ducu. 11Meno bimiyo icur ikare ma nongo dong icok to, ma nongo ringo komi kacel ki cogoni gibijunge woko. 12Dong i biwaco ni, “Pingo akwero winyo lok me pwony, dok abedo kacayo lok me juk ki i cwinya? 13Pe abedo kawinyo lok ma lupwonya gubedo ka pwonya kwede, ada pe awinyo lokgi. 14Cutcut anongo ni nyinga dong obale woko, dok lwak ma gucoke ducu gicayo an acaya.”

15Mat pii ma a ki iwang it ma meri kikome, ki pii ma mol bene ma a ki iwang it ma meri kikome. 16Pe myero iwek pii matye iwang it ma meri ducu omol oket woko ata, ma piine mol pong wa i yogu ducu. 17Wek piine obed meri keken me konyi, ento pe obed me konyo ji ata. 18Gum obed ikom dakoni ma inyomo ka tinoni ma en wang it ma meri, dok cwinyi myero obed yom ikome, 19en dako manen mwonya mada, ma yomo cwinyi atika. Nen bere wek oyom cwinyi ikare ducu, kare ducu wek mar mere oloo kwoni. 20Latina, pingo imiyo ki bwoli kun i maro dako ma malaya? Pingo ikwako kor dako ma lakwele? 21Rwot ngeyo kit kwo pa dano acel acel, dok neno kama en cito iye ducu. 22Bal pa ngat marac tye macalo owic ma mako tyene, bal ma en timoni aye mako en. 23En to pien pe twero juke kene, dong en rwenyo woko ki mingo madit ma en tye kwede.