Carolok 4

Gin maber ma ryeko kelo

1Lutino, wuwiny pwony ma wonwu pwonyowu kwede, wuket cwinywu kawinyone, miyo wubibedo ki niang matut. 2Gin ma atye kapwonyowu kwede en gin maber mada; pe myero wubwot, ento wiwu opo iye. 3Ikare ma onongo an pud latin matidi, ma pud abedo latin acel keken bot maa, 4wora obedo kapwonya, kun waca ni, “Ket lok ma apwonyi kwedegu ducu i cwinyi; lub cika wek ibed kwo. 5Wii pe owil, dok bene pe myero ibwot lok ma apwonyi kwede. Nong ryeko kacel ki niang matut. 6Myero imar ryeko, pe ikwer; pien en bigwoki miyo ibedo maber labongo ayela mo. 7Kit ma itwero doko ryek kwede ene: Nong ryeko, ket cwinyi wek ibed ki cwiny me niang makato jami mukene ducu. 8Mar ryeko, ci en bimiyo idoko dit; kace imako maber, ci bimiyo kiwori. 9Ryeko bikelo deyo boti, bimiyo dano giwori.”

10Latina, kong iwiny loka dok iket bene i cwinyi, ci ibirii i lobo pi mwaka mapol. 11Dong atyeko pwonyi ki yo me ryeko, atyeko nyutu boti bene kit yo me bedo ki kwo matye atir. 12Gin mo pe ma biriine inyimi kace itye kawot ki ryeko; ka ibingwec, ci pe ibitwome atata. 13Mak pwony ma kimiyo ki in matek, pe iwek obwoti; gwok maber, pien meno aye kwoni. 14Pe ilub yo pa jo maracu, pe ilub kit kwo pa jo ma gin lutim maracu. 15Gwoke, pe iwot ki i yogi; loke iwek timo gin marac, ci iwot meri anyim. 16Jo maracu pe gitwero nino ka peya gutimo tim marac; dok pe gitwero nino kace peya gumiyo dano mo opoto i can. 17Timo tim maracu odoko calo cam ki botgi ki timo bwami bene odoko calo kongo bwino ma gimatoni. 18Ento kit kwo pa jo ma kitgi atir obedo calo dero me rupiny, maryeny nio wang ma piny dong leng. 19Kit kwo pa jo maracu col calo dyewor; ka gupoto bene ci pe giniang gin ma nongo oyokogi.

20Latina, ket cwinyi i loka; winy gin ma an awaco. 21Pe myero iwek orweny woko ki boti; myero igwok i cwinyi. 22Lok magi gimiyo kwo bot ngat ma owinyogi, dok cango two ma ikome woko ducu. 23Gwoke ikom tam ma itamo ki i cwinyi ducu; pien kwoni ducu a ki i lok ma i cwinyi. 24Pe myero ibed kaloko lok mugom, wek loko lok goba bene obedi. 25Myero inen anyim atir, dok icik wangi me neno jami ducu matye anyim. 261Myero ingii gin ma ilubu, ci bimiyo gin ma itiyo ducu bedo atir. 27Pe ingak idok tung acuc nyo tung acam; loke, pe i mar timo gin marac.