Carolok 3

Miyo tam bot jo matino

1Latina, pe myero wii owil ikom pwony ma apwonyi kwede, ento gwok cika i cwinyi. 2Pwony ma mera ducu bimiyi irii i lobo pi kare malac, pi mwaka mapol, ki dok bimiyo ibedo ki kuc ki lonyo madwong. 3Pe ibwot ada ki gen ma itye kwede; twegi gubed inguti, dok icoogi i cwinyi macalo icoyo ikom got. 41Kitmeno i binongo gum ki kit maber i wang Lubanga kacel ki iwang dano.

5Gen Rwot ki cwinyi ducu, pe ibed kajenge ikom niang ma itye kwede. 6I kit kwoni ducu wii myero opo ikom Rwot, ci en bitiro yo ma iwoto iye bedo atir. 72Pe myero ibed katamo kekeni ni i ryek; lwor Rwot, ci iloke iwek timo gin marac. 8Ka itimo kumeno, ci bibedo yat ma bicango two ki ikomi, dok bikweyo komi. 9Wor Rwot ki lonyoni ma itye kwede ducu, dok ityer cam mukwongo cek i potoni me wi mwaka; 10ci deroni bipong ki cam madwong, ki kongo bwinoni bipongo opoko mapol ata. 1134

Latina, pe myero i caa juk pa Rwot, myero imak lok ma en yubi kwede macalo lok me poyo wii, 125pien Rwot pwonyo dok yubu ngat ma en maro, en tye macalo wego ma pwodo latin ma cwinye maro adada. 13Dano ma dong onongo ryeko tye ki yomcwiny, ki dano ma dong olimo niang matut bedo kitmeno, 14pien kelo gin maber makato lonyo me ryal, ki magoba me lonyone bene kato me jabu. 15Ryeko ber kato jami me welgu, pe tye gin mo ma imito ma ki twero poro kwede. 16Ryeko tye ki kwo ma rii nakanaka i cinge tung acuc; lonyo kacel ki deyo gitye i cinge tung acam. 17Yone yo mamiyo yomcwiny madwong, ka iwoto i yone ducu inongo kuc keken. 18Ryeko tye macalo yat me kwo bot jo ma gumako matek liking; jo ma gumake matek liking kilwongogi ni jo ma cwinygi yom.

19Rwot ocweyo lobo ki ryekone;

dok pi ngece omiyo en oketo polo i kabedone.

20Pii matye ite lobo gunye pi ngece,

ki pol miyo kot cwer bino piny i lobo.

21Latina, gwok ryekoni kacel ki niang matut ma itye kwede; pe iwek gurweny woko ki iwangi. 22Gibimiyo ibedo ki kwo i cwinyi, dok gibibedo macalo gin mo ma iruku inguti me deyo. 23Man bimiyo kwoni bibedo maber ma pe i paro gin mo, wa gin mo ma kelo adwala inyimi bene bibedo peke. 24Kace ibedo piny, pe ibilworo gin mo liweng; ka dong ibutu piny, ci ibinino nino mamit atika. 25Pe ibibedo ki par mo ka ineno can opoto ikom jo maracu macalo yamo kot, kadi bed ka can opoto ikom jo maracu otyekogi woko liweng. 26Pien Rwot aye bibedo ngat ma igeno; dok en bigwoki, miyo owic pe mako tyeni. 27Pe ikwer tiyo gin maber bot dano ma mito ni ikonye, ma nongo itye ki twero me tiyone. 28Pe iwac ki lawoti ni, “Kong icit, ka dok idwog lacen,” makun nongo itwero konye icawa meno kikome. 29Pe myero ipir lok me timo gin marac ikom lawoti, ma kun nongo en bedo ki gen ikomi nino ducu. 30Pe myero ipyem ki dano mo labongo tyen lok mo, makun nongo en pe otimo gin mo marac ikomi. 31Pe iwek nyeko omaki ikom jo ma gin lubwami, dok pe ilub kitgi mo kadi ki acel; 32pien Rwot dag jo ma gitimo gin marac akaka, ento en tye ki gen ikom jo ma kitgi atir. 33Rwot ceno gangi pa jo maracu, ento en miyo gum ikom gangi pa jo ma kitgi atir. 346Rwot cayo jo ma lungala, en nyutu kicane bot jo ma mwol. 35Jo ma gin luryeko kiketo deyo madit ikomgi, ento luming ginongo meggi can keken.