Carolok 2

1Latina, kace iketo loka i cwinyi, ma igwoko bene cika i tami, 2kun itero iti kawinyo lok me ryeko, dok iketo cwinyi bene me niang, 3kace ibako dogi pi yenyo ngec, dok i kok ki dwon malongo pi nongo niang, 4kace iyenyo macalo iyenyo lim ryal, kun iyenyo bene macalo itye kayenyo lonyo ma kikano; 5ka itimo meno, ci ibiniang ikit me lworo Rwot dok ibibedo ki ngec ikom Lubanga. 6Rwot aye mamiyo ryeko; ngec ki niang bene gia ki bote. 7En kano ryeko maber tutwal pi jo ma cwinygi atir; en kwot ma gwoko jo ma cwinygi leng, 8dok gwoko jo ma gitimo gin matye atir, gwoko bene jo ma gimiyo kwogi bote.

9Ka itimo kumeno, ci ibiniang gin matye atir, ma opore, dok maber, ci ibilubu yo matye atir keken. 10Pimeno cwinyi bipong ki ryeko, ki ngec ma ibilimo bimiyo ibedo ki yomcwiny. 11Ngec ma itye kwede bigwoki, niang maber bikuri; 12bilari ki i yo me gin marac, dok bilari ki i cing dano ma gikelo ayelayela, pi lok ma giwaco. 13Gin jo ma gibwoto bedo ki kwo matye atir, ma gimito wot i piny macol, 14kun cwinygi yom itimo gin marac dok ginongo yomcwinygi i gin marac makelo ayelayela: 15gin jo ma yogi ogom, dok kitgi pe atir, gimaro timo gin maracu.

16Ryeko bimiyo iloyo tam pa dako ma lakwele, ma nongo biti ki lok mapwot me ywayo tami. 17En dako ma bwoto cware ma onyome ka tinone, kun pe gwoko gicike ma okwonge kwede bot cware inyim Lubanga; 18ma ka idonyo i ode nongo itye kalubu yo me to, yo pa dakonu teri mere i lobo pa jo ma oto. 19Pe tye ngat mo ma donyo bote matwero nongo yone me dwogo cen, pe bene gitwero nongo yo ma tero dano i kwo. 20Pimeno myero inen ni ilubu yo pa jo ma kitgi beco, kun bene ilubu yo pa jo ma kitgi atir. 21Jo ma cwinygi atir gibibedo i lobo ki jo ma gin lugen ma pe gitye ki bal mo gibibedo iye matwal. 22Ento jo maracu kibityekogi woko ki i lobo meno, ki jo ma gungayo wang Rwot pi bal me nek bene kibiputugi macalo giputu doo.