Carolok 1

Kony pa carolok

11

Carolok pa Solomon, wod pa Daudi, rwot me Icrael.

2Carolok magi konyo dano me ngeyo ryeko ki pwony maber, ki me niang lok mamiyo niang matut, 3dok gipwonyo dano me bedo ki ryeko i gin ducu ma en tiyo, bedo ki kit matye atir, ngolo kop atir, kun tiyo ki dano ducu maromrom. 4Gipwonyo dano ma pe tye ki kit ngec mo, ci doko ryek; dok miyo ngec bot jo matino me moko lok maber pirgi ken gi. 5Carolok magi bene medo ngec bot ngat maryek, telo dano matye ki niang matut i tice, 6wek guniang tyen lok moni ma i carolok moni ki cal gin ma giloko ikome, ki koclit ma luryeko gibolo.

Miyo tam bot jo matino

72

Lworo Rwot en aye acaki me ngec. Jo maming gicayo ryeko dok gikwero pwony woko.

8Latina, winy lok ma woru pwonyi kwede, pe ikwer winyo pwony pa meni bene 9pien pwonygi twero yubu kiti maber, tye calo tok maber me aketa iwii, dok calo gingut ma iketo inguti miyo inen mwonya.

10Latina, ka lubalo giomo cwinyi ki lok mo, pe myero iye. 11Gwok nyo gibiwaco ni, “Bin kacel kwedwa, wek wakii dano mo wanek woko, wakur dano ma pe tye ki bal wanek woko; 12wek wamwonygi woko ducu makwo macalo lyel, gubed macalo jo ma donyo piny i bur. 13Lonyo mapatpat ducu bidoko mewa, odiwa bipong ki jami ma wayako; 14bin i ribe kwedwa, wan ducu wabitic ki kicaa lim acel.”

15Latina, pe i ribe kawot ki jo macalo meno, gwoke pe i lub korgi; 16tyen gi lyet me ngwec katimo bal, gin nino ducu gitye ma guyube me oyo remo pa dano. 17Ciko obwo konyo ango ka winyo tye kaneni? 18Ento jo macalo meno giciko owic pirgi ken gi, gin gibito i owicgi ken gi. 19Meno aye can ma mako jo ma gin lubwami, meno aye gin ma kwanyo kwogi woko.

Lwongo pa ryeko

203

Wuwiny, ryeko tye kalwongo i yoo gudogu; en kok ma lwongo lwongo i cuk ki dwone ma longo; 21en tye kalwongo matek ki iwi cel; wa i dog taun maditgu en bedo kalok aloka ni, 22“Wun jo ma luming, wumito wubed ming pi kare marom mene? Lucac mono gibibedo ki yomcwiny pi kare marom mene ki cacgini? Luming, wun mono wudag pwonye ma miyowu ngec? 23Wuwiny lok ma an awaco botwu; nen, abinyutu tama ducu botwu; abimiyo wungeyo loka. 24Abedo kalwongowu ni wubin, ento wun wukwero winyo lwongona; aryeyo cinga, ento pe tye ngat mo ma oketo iye cwinye. 25Wucayo tama ducu ma amiyo botwu, wun pe wuye ni ayubwu. 26Pimeno ka can opoto ikomwu an abinyerowu anyera; abingalowu bene angala ka gin makelo lworo opoto ikomwu ma obangowu woko. 27Ikare ma can man bibangowu woko macalo yamo me nam, can ma bene bino macalo yamo lapiru, en aye ikare meno wubibedo ki arem ki cwercwiny madwong. 28Ikare meno aye wubicako lwonga kwede, ento an pe abigamo dogwu; wubiyenya ki cwinywu ducu ento pe wubinonga. 29Wukwero ngec mamiyo wupwonye dok bene pe wuye lworo Rwot, 30pien wukwero winyo tama, dok wucayo yub ma mera pirwu woko. 31Pimeno wubikoko angee pi gin maracu ma wutimo dok wubikumu pi timwu maracu. 32Jo ma pe gitye ki ngec gito pien gikwero yenyo ryeko, kwero loko tam ma lumingo gitye kwede en aye tyekogi. 33Ento ngat ma biwinyo loka bibedo ma ocung matek; en bibedo ma pe lworo gin marac, labongo par mo.”