Obadia 1

11

Man aye lok ma Rwot Lubanga onyutu bot Obadia ma okemo jo Edom.

Rwot Lubanga bipwodo Edom

Rwot dong otyeko oro lakwenane bot rok ducu,

ci wan dong wawinyo lok me kwenane kun en waco botgi ni,

“Wua malo! Wek wacitu ka lweny ikom jo Edom!”

2Rwot waco kuman bot jo Edom ni,

“Nen, abimiyo wudoko jo magoro ikin lurok,

ma jo ducu dok bicayowu matek mada.

3Wake matye i cwinywuni dong otyeko bwolowu mada.

Wun wubedo jo ma ikin got ma obar,

ma wubedo i kabedo matye malo tutwali,

ka dok wuwaco ki i cwinywu ni,

‘Anga kono matwero dwokwa piny wa i ngom!’

4Kadi bed wubed malo calo ocur,

kadi wuger odiwu malo wa ikin lakalatwe,

ento pud abicorowu woko piny aye ki kunu!

5Kace lukwor ma gin luyak gubino kakwor i dyewor,

ci gin giyako jami ma cwinygi mito keken.

Kace lupwon nyig olok gucito kapwono nyig olok,

ci kare ducu gipwono kun giweko nyig olok mogo dong me abeka.

Ento koni dong lukworwu guyakowu woko liweng labongo gin mo ma odong.

6Wun likwayo pa Ecau,

dong kibiyako lonyowu woko liweng!

7Jo ducu mayam wuribe kwedgi dong gibibwolowu abwola,

gin dong gibiryemowu ki i lobowu.

Jo mayam gibedo kwedwu ki kuci dong gibiloyowu woko.

Luremwu mayam wugenogi ma wucamo kacel kwedgi dong gibibwolowu

ci gibiciko owic kama wuwoto iye ducu,

kun giwaco ni, ‘Lwak ryeko mayam onongo gitye kwedeni dong tye kwene kaa?’

8Inino meno en aye abipwodo iye Edom,

abityeko jone ma gin luryekoni woko,

ci abirucu ryekogi woko liweng.

Man lok ma an Rwot kikome aye oloko.

9Dok in Teman,

jo ma gin twoni oteka lwenyi komgi bionyo koyo woko ki tipu komgi bito woko lirut,

ci kibineko lulweny me Edom woko liweng.”

Tyenlok me pwod ma kibiketo ikom Edom

10Rwot waco kuman ni, “Pi timwu me bwami ki nek ma wutimo ikom omegiwu ma gin likwayo pa Yakobo,

dong kibityekowu woko dok wubibedo ki lewic matwal pire.

11Inino ca ma lumerok guturu dogcel pa jo pa Yakobo, wun wucung ki cen dok pe wukonyogi.

Inino meno wun wubedo rac calo jo ca ma pe kingeyogi

ma guyako iye lonyo me Jerucalem wokoni,

ci gubolo kwir pi pokone ikin gi.

12Onongo pe myero ki wun me bedo ki yomcwiny inino meno,

pi gin marac ma otime ikom omegiwu;

pe onongo myero kwedwu me um ikom jo Juda,

inino ma kijwerogi iye.

Dok pe obedo ber pi wun me wake awaka

inino ma can opoto ikomgi.

13Onongo myero pe wudony i dogcel pa lwaka kacel ki lukworgi

inino ma can opoto ikomgini;

dok onongo pe myero wubed ki um inino ca pi can madwong ma opoto ikomgi;

ci wucoko lonyogi woko

inino me to pinygini.

14Pe onongo myero wucung i angakangaka yoo,

me ngolo jo ma onongo giringo woko me laro komgi;

dok pe onongo myero dong wumak danogi ma gubwote

ki me miyogi i cing lukworgi,

inino me aremgi madwong ca.”

Lubanga bingolo kop ikom rok ducu

15Rwot waco kuman ni, “Nino ca dong cok kabino ma an Rwot,

dong abingolo kop ikom rok ducu.

Dong in Edom, gin ducu mayam wutyeko timoneni dong kibitimo ikomwu bene,

dok tim mewu bidwogo iwiwu gire.

16Jona kipwodogi ki lakit pwod malit atika

iwi got mera maleng.

Ento rok ducu ma orumugi bene kipwodogi ki lakit pwod malit acelu;

dok bene bibedo pwod malit makato,

ci gibirwenyo woko matwal ma pe gibingeyo ni yam kong onongo gubedo tye.”

Loc pi jo Icrael

17“Ento jo ma gubwot gibibedo iwi got Cion,

ci bibedo Kabedo Maleng;

ki jo me ot pa Yakobo bene gibibedo ki lobo ma meggi kikome.

18Jo me ot pa Yakobo gibidoko calo mac,

ki jo me ot pa Yucepu gibibedo calo leb mac,

ki jo me ot pa Ecau gibibedo meggi calo reng kal;

ma kibiwangogi ci kibityekogi woko ducu.

Pe tye dano me ot pa Ecau mo ma bidong;

pien an Rwot dong atyeko loko.

19Jo Negeb gibileyo got Edom,

jo Cepela gibileyo lobo pa jo Piliciti;

jo Icrael gibileyo lobo Epraim ki lobo Camaria ento Benjamin aye bileyo Gilead.

20Jo Icrael ma kiterogi i opii i Kalak,

gibileyo Kanaan nio wa Jarepat;

ki opii ducu mayam kimakogi ki i Jerucalem ma gitye i Ceparad

gibileyo taun gi ducu me Negeb.

21Lumony me Jerucalem gibioto lweny ikom Edom ci gibidoko laloce.

Ci Rwot kikome aye bibedo laker ma meggi.”