Amoc 9

Ngolo kop pa Lubanga ikom Icrael

1Yam aneno Rwot ocung inget keno tyer, ci owaco ni, “Go wi lubele me wir, wek rii dogola oyenge, turgi woko, wek ma onginyene oo iwi dano ducu. Ci jo ma gudong ki ikin gi abinekogi woko ki pala lucwan. Ngat acel mo ikin gi pe biringo, dano acel mo pe bibwot. 2Kadi bed gukwiny kakanegi piny ibur lyel matut, ci abikwanyogi woko ki kunu ki cinga; kadi bed guit malo i polo, ci abiomogi woko ki kunu adwokogi piny; 3kadi bed gukane iwi got Karmel, ci abiyenyogi ki kunu, amakogi woko; kadi bed gukane ki bota wa ite nam, ci abiciko twol ki kunu tongogi. 4Kadi bed kiterogi i opii inyim lukworgi, ci abiciko wek kinekogi woko ki kunu ki pala lucwan; ci abiketo wanga ikomgi pi timgi maracuni. Ayube me tyekogi ento pe pi konyogi.”

5Rwot Lubanga me mony,

ka ogudu lobo, ci oyengyeng time,

ci jo ducu ma gibedo iwi lobo gikok;

lobo ducu twage atwaga calo kulu Nail ma opong,

ci twage calo kulu Nail ma i Ejipt.

6En gero kicikane mamalo i polo,

kun miyo dane gule iwi lobo;

en lwongo pii me nam,

ci coro woko iwi lobo.

Nyinge Rwot.

7Rwot owaco kuman ni, “Wun jo Icrael, an aparo pirwu marom aroma ki kit ma aparo pi jo Etiopia. Yam akwanyowu ki i lobo Ejipt, i yo acelu bene yam akwanyo jo Lupiliciti ki i Kaptor, ki jo Ciria ki i Kir. 8Nen, an Rwot Lubangawu atye kaneno kerwu matye ki bal, ma abijwero woko ki iwi lobo ento pe abityeko likwayo pa Yakobo ducu.

9Pien nen, abiciko, ci abiyengo ot pa Icrael ki ikin rok mukene ducu, calo ngat ma kiyo moko ki keikei, abiyeko jo Icrael maracu ducu. 10Lubalo ducu ma ikin jona kibinekogi ki pala lucwan, gin jo ma giwaco ni, ‘Gin marac mo pe bipoto ikomwa, ariya mo pe binen inyimwa.’”

Rwot bidwoko gum pa jo Icrael botgi

111

Rwot owaco kuman ni, “Nino tye kabino ma abiroco ker pa Daudi mayam opoto macalo ot ma omuk. Abiyubu guti mayam omuki woko. Kama yam obaleni abiilone malo dok kakare. Abirocone odoco bedo kit macalo yam con. 12Ci jo Icrael biloyo lobo pa jo Edom mayam odong, ki rok ducu mayam onongo kilwongogi ki nyinga. Man an Rwot kikoma aye abitiyo.

13Kare tye kabino ma camwu bicek ma kac biromo ki wadi,

kare me nyono olok biromo ki wadi.

Kongo bwino manyen bicwer ki iwi godi,

bimol iwi godi matino ducu.

14Abidwoko jona jo Icrael cen i lobogi,

ci gibigero taun gi madito mayam obaleni woko odoco, gibedo iye,

gibipito olok, ci gibimato kongo bwinone,

gibipuru poti, ci gibicamo cam ma ocek iye.

15Abipitogi i lobogi, ci gibimoko macalo yat,

ci pe dok kibiputugi woko

ki i lobo ma dong amiyo botgi.”

Man lok pa an Rwot Lubangawu kikome.