Amoc 8

Ginanyuta me aduku ma opong ki nyig yadi me acama

1Man aye ginanyuta me angwen ma Rwot Lubanga onyuta. Aneno, aduku matye iye nyig yadi me acama ma gicek i agiki mwaka. 2Ci Rwot openya ni, “Amoc, ineno gin ango?” Ci agamo ni, “Aduku matye iye nyig yadi me acama ma gicek i agiki mwaka.”

Ci Rwot dok owaca ni, “Agiki dong oo ikom jona jo Icrael; pe dok abiloko tama ikom pwod ma abiketo ikomgi. 3Inino meno wer me Ot pa Lubanga bidoko me koko. Kom jo ma oto bibedo mapol. Dong iling mot.”

Can ma bipoto ikom lobo Icrael

4Wuwiny man, wun ma wunyono jo ma piny obwoyogi, ki ma wumito tyeko lucan woko ki i lobo. 5Wun wuwaco ni, “Karama me Por Dwe bitum awene, wek wacat belwa? Cabit kono bigik awene, wek wakel nganowa me acata?” Kun wupiro lok ni, “Wek wacat nganowa ki agwata matidi, wapim limgi ki cekel mapek, kun wabumu dano ki mijan ma pe pimo kakare. 6Wabicato ngano maracu i wel ma lamal. Wabinongo ngat ma piny oloyo ma pe romo culu banyane, ci wabiwile doko opiiwa i wel me war tyen keken.”

7Rwot ma jo Icrael wake kwede otyeko kwongo kwong ni, “Wiya pe biwil ikom timgi maracu ma gitimo. 8Ci lobo biyenge pi lok man, kun cwiny ngat acel acel matye i lobo bingabe angaba pi koko cane. Lobo ducu bitwage malo macalo kulu Nail ma opong, bitwage dok piny calo kulu Nail ma i Ejipt. 9Kare bibino ma ceng bipoto i cwiny dyeceng, abicido lobo woko ikare ma ceng ryeny. An Rwot me mony dong atyeko loko man. 10Abiloko ninowu madito ducu doko nino me kwero cola, ki werwu me yomcwiny bidoko wer kumu. Abimiyo jo ducu tweyo bongo cola i pyergi, ki wi dano ducu kibilyelo woko; ci wubibedo calo dano ma koko latine ma onywalo acel keken, agikine bibedo nino me cwercwiny madwong.”

11Rwot Lubanga dok owaco ni, “Kare bibino ma abicwalo kec i lobo man, pe kec kwon, onyo orwo pii, ento kec ki orwo me winyo lok pa Rwot.

12Dano bimal ata nia ki i Nam me Kado nio wa i Nam Mediterranean, ki nia ki tung kumalo nio tung kupiny; gibiringo ata pi yenyo lok pa Rwot, ento pe gibinongo. 13Inino meno anyira ma gibeco ki lutino awobe komgi biloc woko pi orwo pii. 14Jo meno ma gikwongo kwong ki nying Acima me Camaria, ma giwaco ni, ‘Macalo lubanga me Dan tye makwoni,’ dok ni, ‘Macalo lubanga me Beer-ceba tye makwoni,’ gibipoto piny ma pe gibia malo matwal.”