Amoc 7

Ginanyuta me Bonyo

1Rwot Lubanga onyuta man: ci aneno en tye kacweyo lwak bonyo ikare ma dong kityeko nyaro lum me acama pa dyangi pa rwot ci lum onongo dong ocako lot tyen me aryo. 2Ikare ma dong gutyeko camo lum woko ki i lobo, ci awaco ni, “Ai Rwot Lubanga, timgi kica do! Likwayo pa Yakobo gitwero cung ningning ma kun gin ginok adada dok gigoro!”

3Ci Rwot oloko tame ikom lok man kun waco ni, “Gin ma inenoni pe dong bitime.”

Ginanyuta me mac

4Rwot Lubanga dok onyuta lanyut mukene: ci aneno, Rwot Lubanga onongo tye kaciko ni kingol kop ikom jone ki mac; ci mac owango kut matut otyeko woko, ka dok ocako wango lobo bene. 5Ci awaco ni, “Ai Rwot Lubanga, dong iwek do! Likwayo pa Yakobo gitwero cung ningning, ma kun gin ginok mo dok gigoro bene adada?”

6Ci Rwot Lubanga dok oloko tame ikom man kun waco ni, “Man bene pe dong bitime.”

Ginanyuta me birigi

7Man dok gin ma Rwot onyuta: aneno Rwot ocung inget cel me gang ma kigero kun kipimo ki birigi. Rwot onongo omako birigi i cinge. 8Ci Rwot openya ni, “Amoc, ineno gin ango?” Ci agamo ni, “Birigi.”

Dok Rwot owaca ni, “Nen, atye katic ki birigi me nyutu ni jona gubedo calo cel ma kicweyo ma ogom. Pe dok abiloko tama ikom pwod ma abipwodogi kwede. 9Kabedo ducu pa likwayo Icaka mayam giwora iye iwi godi kibibalogi woko. Kabedo maleng ducu pa jo Icrael bidong obur. Abicwalo lumerok ka lweny ikom lobo ci gibityeko jo me ot pa rwot Jeroboam woko liweng ki pala lucwan.”

Amoc ki Amajia

10Ci Amajia, ajwaka me Betel, ocwalo lok bot Jeroboam, rwot me Icrael, ni, “Amoc tye kapiro lok ikomi, ikin jo Icrael; oweko lobo man pe twero ciro lwak lok ducu ma en owaco. 11Pien Amoc dong owaco kumeno ni, ‘Kibineko Jeroboam woko ki pala lucwan, ci kibikwanyo jo Icrael ki i lobogi ci kiterogi i opii.’”

12Ci Amajia owaco bot Amoc ni, “In lanebi, dok cen i lobo Juda, wek inong culi ki kunu, itit lok nebi bene ki kunu. 13Ento pe dok itit lok nebi i Betel, pien kany kabedo pa rwot, ot ma en woro iye Lubanga me ker man.”

14Amoc odok iye ki Amajia ni, “An pe lanebi, an bene pe atye i dul pa lanebi mo; ento yam an lakwat, ki layub nyig olam me acama. 15Ci Rwot okwanya ki kalubu kor romi, ci owaca ni, ‘Cit itit loka bot jona jo Icrael.’ 16Pimeno, koni dong iwiny lok pa Rwot. In iwaco ni, ‘Pe itit lok pa Lubanga ikom Icrael,’ dok ni, ‘Pe ibed kalok ikom ot pa Icaka.’ 17Pimeno, Rwot owaco kuman ni, ‘Dakoni bidoko malaya i gang, dok awobeni ki anyirani kibinekogi woko ki pala lucwan. Potiwu kibipoko woko kun kipimo ki tol; dok in kikomi ibito i lobo pa lurok, ki jo Icrael kibikwanyogi woko ki i lobogi, ci kibiterogi i opii ada.’”