Amoc 6

Kibibalo lobo Icrael woko

1Wubineno can, wun jo ma wutye agonya i Cion, wubineno can wun jo ma wutamo ni wutye ki kuc iwi got me Camaria, wun luloc madito me Icrael, ma jo Icrael ducu gibino botwu pi nongo kony. 2Kong wucit wunen taun madit me Kalne, ci wua ki kunu, wuwot wa i Kamat en taun maditi; ka dok wucit piny i Gat taun madit pa jo Piliciti. Gin gibeco makato kerwu woko ce? Nyo wutamoni lobogi lac makato lobowu bo? 3Wun pe wuye ni nino marac tye kabino, ento wutye katiyo tic ma nyiko ninonu kelo cok mada. 4Can iwi jo ma gibutu iwi kitanda ma kideyo ki lak lyec! Wuryene iwi komwu mayom, wucamo lutino romi, ki roci ma kipito i dwol; 5wuwero werwu kun wulubu dwon nanga, wuroto gin goyo wer manyen me agoya calo Daudi. 6Wumato kongo bwino ki awalkwon, dok bene wuwiro komwu ki moo ma ngwece kur, ento cwinywu pe cwer pi topaco pa Icrael. 7Pieno wun wubibedo jo mukwongo me atera i opii, ci karamawu bigik woko.

8Rwot Lubanga ma en Rwot me mony dong okwonge ki nyinge kene ni, “Iya okwero wake pa Yakobo, akwero bene odine madongoni woko. Dong abimiyo taun maditi bot lakwore, kacel ki gin ducu matye iye.”

9Ka dano apar gudong i ot acel ci gibito. 10Lacen wat pa latoni, ma en aye myero oyike ilyel, bitingo kome pi kelo woko ki i ot. Ci wat pa latoni bipenyo ngat mo keken ma odong i ot kun waco ni, “Pud tye ngat mo ma odong i ot boti kenyo?” Ci dwon bigamo ni, “Peke.” Ci wat pa latoni biwaco ni, “Ling litik! Omyero wagwoke mada wek pe walok kadiwa nying Rwot.”

11Ka Rwot dok biciko, ci kibitwomo odi madito ki matino, ci kinginyogi woko ma tinotino. 12Aguragura tika giringo ikom pata? Tika kipuru nam ki kweri dyang? Ento wun wuloko ngolo kop atir odoko kwir, tim ma atir wuweko odoko gin marac, 13wun jo ma wutye kaum pi mako taun me Lo-debar, ki ma wuwake ni, “Wamako Kamaim pi tekowa kenwa.”

14Pieno, abiilo rok mukene ikomwu, wun jo Icrael ci gibiunuwu nia ki i yoo me donyo i Kamat nio kwede wa i kulu ma i Araba. Man lok pa an Rwot ma Lubanga me mony kikome.