Amoc 5

Wungut wek wubed kwo

1Wuwiny wun jo Icrael, wuwiny lok man ma aloko ikomwu calo wer lyel:

2Icrael ma pud rinini dong otyeko poto woko,

pe dok bia;

dong kityeko kwere woko i lobone,

ngat mo peke ma ile malo.

3Rwot Lubanga waco kuman ni, “Ikare ma merokwu bioto mony ikomwu, wubitero jo alip i lweny ento wubidong ki dano miya keken; taun madit mukene bitero jo miya ento bidong ki dano apar keken.”

4Rwot owaco bot jo me Icrael ni, “Wubin bota, wek wubed kwo. 5Pe wubed kawot i Betel, wuwek donyo i Gilgal, pe wukat wa i Beer-ceba; pien Gilgal kibitero woko i opii, ki Betel bidoko gin ma konye peke.”

6Wubin bot Rwot, wek wubed kwo, ka pe ci en bityeko jo me ot pa Yucepu calo mac ma wango piny woko liweng, labongo ngat mo i Betel maromo nekone. 7Wubineno can wun jo ma wungolo kop kilong, ma ka ngolo kop atir, wubolo kit ma atir woko piny. 81

Ngat ma otiyo lakalatwe, Yoggo ki Lyernyim,

ngat maloko colpiny doko odiko, ki dyeceng doko wor,

ngat ma lwongo pii me nam,

ci coro woko iwi lobo,

nyinge Rwot.

9En balo gedo matek kun nginyo woko macalo lutkot,

miyo kituru cel gogo kinginyo woko.

10Wun wudag ngat ma jukuwu ki kama kingolo iye kop atir, cwinywu kwero ngat maloko lok ada. 11Pien wun wudiyo lucan kun wujogo nyig kal ki botgi tektek, pimeno kadi bed wugero odiwu ki gweng apaya, pe wubibedo i igi; dok kadi bed wupito olok i potiwu ma yomo cwinywu, pe wubimato kongo bwinone. 12Pien angeyo ni wutimo bal mapol, angeyo kit balwu madongo ducu, kit ma wuyelo ki jo ma kitgi atir, kun wugamo lim me wilowu, ci wuryemo jo ma piny obwoyo ki i kabedo me ngolo kop. 13Pieno ngat ma laryeko biling alinga ikare ma kitmeno, pien karene rac mada.

14Wulub gin maber, pe gin marac, wek wubed kwo; kumeno, Rwot ma en aye Lubanga me mony, bibedo kwedwu, kit macalo wun wuwaconi. 15Wukwer gin marac, wumar gin maber, wumii kingol kop atir i otkot; gwok nyo Rwot, ma Lubanga me mony, bibedo ki kica bot jo pa Yucepu ma gudong.

16Pimeno Rwot Lubanga me mony ma en Rwot, owaco kuman ni, “Koko bibedo i dyekal ducu; i wanga yoo ducu dano bikok ni, ‘Aya! Aya!’ Kibilwongo lupur ni gubin kakumu, ki jo ma ngeyo wer lyel wek gubin, ci gukok. 17Koko bibedo wa i poto olok ducu, pien abikato awok ki i dyewu, pi pwodowu. Man an Rwot aye awaco.”

18Wun jo ma wumito nino pa Rwot komwu kec! Pingo wumito nino pa Rwot? Piny bibedo col inino meno labongo dero mo. 19Bibedo rom ki dano ma oringo labwor, dok orwate ki kwac; nyo odonyo i ot ci ojengo bade ikom kicika, ci twol dok otonge. 20Inino pa Rwot, piny bibedo col aye, ma dero mo peke, piny bicido woko licuc, gin mo ma meny iye bibedo peke. 212

Rwot waco kuman ni, “Cwinya dag karamawu me nino madito, acayogi woko, cokewu me wora pe yomo cwinya wa ki acel. 22Kadi bed wutyero bota gitum awanga ki gityer me moko kwon, pe abigamogi; wa gityer lakwecwinywu me lim ma ocwe pe abiciko iye wanga. 23Wukwany woo me werwu woko ki bota; pe abiwinyo dwon nangawu kadi ki acel. 24Ento wuwek ngolo kop atir aye omol macalo pii, kitwu obed atir calo kulu ma mol nakanaka ma pe two.

25Wun jo me ot pa Icrael, ikare mayam kwariwu gubedo kawire i dye tim aroo pi mwaka pyere angwen ca, onongo kong alegogi ni gukel bota gitum ki gityer? 26Pe kumeno, ento koni dong wutye kaworo cal pa Cakkut ma rwotwu, ki Kaiwan, lubangawu ma lakalatwe, ki cal jogiwu ducu ma wupayo pirwu kenwu. 27Pimeno abiryemowu woko i opii wa inge Damaciko.” Man Rwot ma en Lubanga me mony aye owaco.