Amoc 4

1Wuwiny lok man, wun mon me Camaria, ma wucwe calo dyangi me Bacan. Wun mon ma wuburu lucan, ma wudiyo jo ma piny obwoyogi, wun ma wuwaco bot cogwu ni, ‘Wukel kongo, wek wamati!’ 2Rwot Lubanga owaco kuman ni, ‘Pien an kita tye atir, dong akwonge ni kare tye kabino ikomwu ma kibiywayowu woko ki goli calo rec, wun kacel ki jowu ma lacen; ci kibiterowu woko wa i lobo pa merokwu. 3Kibiywayowu woko ki i wang cel ma kimuku, ci kibibolowu woko i Armon.’”

Jo Icrael pe guye pwony

4Rwot owaco kuman ni, “Wun jo Icrael wucit i kabedo maleng i Betel, wek wumede ki timo bal; wucit i Gilgal, ci wumede ki timo bal ki keruwu ducu; wukel gitumwu rupiny ki rupiny, wumii dul acel me aparwu inge nino adekadek. 5Wutyer gitum me pwoc ki mugati ma kirubu iye tobi, wutit pi gityerwu ma iwu opwoyo wek lwak guwiny; pien wun jo Icrael wumaro timo kumeno!

6Yam amiyo kec opoto i gangiwu ducu, amiyo kwon oremowu i kabedowu ducu, ento wun dong pe wumedo ki dwogo bota matwal. 7An bene yam atwonowu kot ikare ma onongo kot myero ocwer i potiwu; amiyo kot ocwer i taun madit acel, ento pe amiyo cwer i taun madito mukene; poto acel kot cwer iye, ento poto mukene kot pe cwer iye, oweko camwu gutwo woko. 8Jo me taun madito aryo nyo adek gucito i taun madit mukene, kayenyo pii, ci pe gunongo pii ma oromogi; ento wun dong pe wumedo ki dwogo bota matwal. Man lok pa an Rwot kikome.

9Yam apwodowu, kun acwalo kwidi i potiwu, amiyo belwu odoko ocone, aweko potiwu ki poto olokwu otwo woko, bonyo gucamo oduru ki yadi jeituniwu; ento wun pe wumedo ki dwogo bota matwal.

10Yam acwalo two gemo ikomwu macalo two gemo me Ejipt; aneko awobewu ki pala lucwan, ayako aguragurawu mapol; ma omiyo ngwec gonywu oduny i umwu ma ngwe; ento wun pe wumedo ki dwogo bota matwal. 111

Yam atyeko jo mogo ma ikinwu, kit macalo yam atyeko kwede Codom ki Gomora; jo ma obwot ki ikinwu onongo obedo calo dog yen ma kikwanyo ki i mac; ento wun pe wumedo ki dwogo bota matwal.

12Pimeno, wun jo Icrael, abitimowu kit man; dong wuyube pi rwate kweda, wun jo Icrael, pien abiketo pwod ikomwu.”

13Lubanga en ngat ma ocweyo godi ki oketo yamo.

En weko tame ngene bot dano.

Lubanga loko rupiny doko piny macol,

dok woto ki malo iwi lobo,

nyinge Rwot Lubanga me mony!