Amoc 3

1Wuwiny lok ma Rwot dong oloko ikomwu, wun jo Icrael, ikom kakawu ducu mayam okwanyogi woko ki i lobo Ejipt: 2“Wun keken aye angeyowu ki ikin kaka ducu ma iwi lobo; pimeno abiketo can ikomwu pi balwu ducu.”

Tic pa lanebi

3Itamoni jo aryo gitwero cako wot kacel ma pe guyubu lok me rwate?

4Itamo ni labwor kok ki i bunga ka pe omako lee?

Latin labwor mono kok ki i boro ka pe omako lee mo?

5Itamo ni winyo moko ki labal ka pe kitero owic pire?

Owic mono tuk nono ki i ngom ka pe gin mo ogudu?

6Ka kikutu obute i gang, ci lworo pe mako dano?

Itamo ni gin marac twero poto i gang ma Rwot aye pe ocwalo?

7Adada Rwot Lubanga pe timo gin mo, labongo yabo munge bot lutice ma lunebi.

8Ka labwor dong okok; ci anga ma lworo pe mako?

Rwot Lubanga dong oloko; dong anga ma twero kwero tito loke?

Can ma bipoto ikom Camaria

9Wutuc lok bot jo ma gibedo i odi ker ma i Aciria, ki i odi ker ma i lobo Ejipt. Wuwac ni, “Wugure kacel iwi godi me Camaria, wunen arubaruba madwong ma iye, ki kit ma kiunu kwede dano i gang meno.”

10Rwot owaco kuman ni, “Jo man gipongo odigi madongo ki jami ma guyako ki gero, dok pe bene gingeyo timo gin matye atir. 11Pimeno lakwor birumu lobogi, bidwoko tekgi woko piny; ci odigi madongo kibiyako woko.”

12Rwot owaco kuman ni, “Macalo lakwat laro tyen romo aryo, nyo dul it, ki i dog labwor, kitmeno bene jo mo manok keken ma gibedo i Camaria aye kibilarogi, ki ikin jo ma gibutu ki kuc iwi kom me wel. 13Wuwiny, ci wubed caden ikom ot pa Yakobo, man Rwot Lubanga me mony aye awaco. 141 Ikom nino ma abimiyo pwod ki jo Icrael pi balgi, abibalo keno tyer me Betel woko. Ten keno tyer kibiturugi woko ci poto piny i ngom. 15Abigoyo odi me cwir wa ki me oro; odi ma kideyo ki lak lyec kibimukugi woko, odi madongo kibimuku. Man lok pa an Rwot kikome.