Amoc 2

Moab

11

Rwot owaco kuman ni, “Pi lwak bal mapol pa jo Moab, pe abidwoko cwinya cen i pwod ma abimiyogi; pien guwango cogo pa rwot me Edom odoko buru. 2Kumeno abicwalo mac ikom Moab, ci biwango odi matego ducu me Keriot. Jo Moab bito i woo madwong me lweny ma nongo acikari gidange, ma obute lweny kok malongo. 3Abineko latela me Moab, ki abineko lutice ducu kacel kwede. Man an Rwot aye ma awaco.”

Juda

4Rwot owaco kuman ni, “Pi lwak bal mapol pa jo Juda, pe abidwoko cwinya cen i pwod ma abimiyogi; pien gukwero lubu cik ma mera, pe gugwoko lok ma an aciko. Jokgi me goba mayam kwarigi gulubu orwenyogi woko ki i yo. 5Kumeno abicwalo mac ikom Juda, biwango odi matego ducu me Jerucalem.”

Ngolo kop ikom Icrael

6Rwot owaco kuman ni, “Pi lwak bal mapol pa jo Icrael, pe abidwoko cwinya cen i pwod ma abimiyogi; pien gicato dano ma kite atir pi lim, dano ma piny obwoyo, wel ma kiwile kwede rom ki wel me wilo war tyen. 7Ginyono wi lucan i apwa me ngom, gigengo yoo ki jo ma gin lucan. Awobi ribe ki wone me butu ki angeca acel, miyo balo nyinga malengi. 8Gibutu girumu nget keno tyer woko ducu ikom bongi ma kijengo botgi; gimato kongo bwino pa jo ma gungolo cul ikomgi i Ot pa Lubanga. 92Ento yam atyeko jo Amor ki inyimgi, mayam giboco calo yat cedar, ma gitego calo kworo. Atyeko nyige ki malo, wa ki lwite piny. 10An kono ceng akwanyowu woko ki i lobo Ejipt, atelowu i tim pi mwaka pyere angwen kulu, wek wucam lobo pa jo Amor. 113Adyero lutinowu mogo pi bedo lunebi, ayero awobewu mogo pi bedo lutic ma mera kikome. Meno pe tye lok ada, wun jo Icrael? An Rwot kikome aye aloko. 12Ento wuweko jo ma gudyere pi tic bot Lubanga gudoko lumat kongo bwino, wuciko lunebi kun wuwaco ni, ‘Pe wutit lok pa Lubanga.’ 13Nen, abinginyowu woko piny i kabedowu, calo gadigadi ma lwiny piny ma opong ki nyig kal. 14Kadi wa langwec madwir atika pe biloyo, latekkom tekone birweny, twon oteka lweny pe bilaro kwone. 15Lamak atum pe bicung, ngat ma tyene dwir pe bilare, kadi ngat ma ringo ki aguragura pe bilaro kwone. 16Ngat ma cwinye nwang ikin oteka lweny bingwec woko munero inino meno. Man an Rwot ma awaco.”