Yona 1

Yona oringo woko ki bot Rwot

11

Inino mo acel, Rwot Lubanga oloko ki Yona wod pa Amittai, kun waco ni, 2“A icit Nineve, ma en tye taun maditi. Wek ecitit lok ikom jone, pi tim meggi maracu ma dong otyeko ngene wa bota.” 3Ento Yona oa me lwi woko ki inyim Rwot pi wot Tarcic. En ocito wa iwang wat me Jopa kama onongo mel ma cito Tarcic; ci oculu lim ma mite pi wot meno, ka ocako donyo i mel ci guwoto ki jo mogo ma ticigi terogi i nam madongo, me cito kwedgi i Tarcic, wek ea woko ki inyim Rwot.

4Ento Rwot ocwalo yamo madwong tutwal i nam, omiyo pii me nam otwage matek tutwal, ma mel onongo dong cok tur. 5Cutcut lukwang mel, gudoko lwor omiyo dano acel acel ocako kok bot lubangane, kun gibolo jami ma onongo tye i mel woko i nam, wek mel odong mayot. Ento Yona ocito mere wa i gul mel kama obutu piny i iye, ci onino kunu matek. 6Ci ladit me mel obino bote ci openye ni, “Itye katimo gin ango? Itye kanino anina? A malo wek ileg lubangani! Gwok nyo lubangani bitamo pirwa miyo pe wato.”

7Ci lukwang mel guloko keken gi kun giwaco ni, “Kong wabolu wunu kwir, wek wange anga ma oweko gin marac man opoto ikomwa.” Gubolo kwir, ci kwir opoto ikom Yona. 8Ci guwaco ni, “Tit ki wan, anga ma oweko gin marac kuman opoto ikomwa? Tici tic ango? In ia kikwene? Loboni kilwongo ningo? In idano me rok mene?” 9Ci Yona ogamo doggi ni, “An Laibru; alworo Rwot Lubanga me polo, ma oketo nam ki lobo.” 10Ci lworo omako jonu matek tutwal, omiyo gupenye ni, “Man gin ango ma itimoni?” Pien jonu onongo gungeyo ni en tye karingo woko wek elwi ki inyim Rwot, pien onongo en kong otito ki gin.

11Ka dok guwace ni, “Man watim gin ango ikomi, wek nami ojuke okwe mot pirwa.” Pien nam onongo tinge mede ameda. 12En ogamo doggi ni, “Wun wutinga, wubola woko i nam, ka wek nam okwe pirwu; pien angeyo ni twage me nam man matek tutwali obino ikomwu pi an.” 13Kadi bed kumeno jonu gukwango mel matek me dok cen iwi tera, ento pe gutwero meno, pien twage me nam obedo ka mede ameda ikomgi. 14Pimeno omiyo gukok bot Rwot Lubanga kun giwaco ni, “Wabako dogwa boti, in Rwot Lubanga, pe iwek wato ka waneko laco man, pe imii remo pa ngat ma pe ki bal odok iwiwa; pien in Rwot Lubanga dong ityeko timo kit macalo i mito.” 15Ci gutingo Yona, ci gubole woko i nam, omiyo twage me nam otugi kwe woko licwic. 16Man omiyo jonu gulworo Rwot Lubanga tutwal; dok gumiyo mot me gitum bot Rwot kun gilubu kit kwong ma gukwongo me tiyo bote. 172

Ento Rwot omiyo rec madit omwonyo Yona woko i iye; ci Yona orii i i rec meno pi nino adek dyeceng ki dyewor.