Yona 2

Lega pa Yona

1Yona olego Rwot Lubangane ki i irec 2kun waco ni,

“Ceng akok bot Rwot i cana,

ci en ogamo doga;

ceng akok ki i lyel,

ci iwinyo dwona.

3In onongo ibola kamatut,

i cwiny dye nam,

pii ma mol oruma woko dyere;

twage me pii ki corene omol okato ki iwiya.

4Ka dok atamoni, onongo kiryema woko ki inyimi,

dok bene pe abineno ot meri maleng ningning.

5Pii omwonya woko,

kut matut oruma dyere;

ci tiro okade woko iwiya.

6Alwiny piny ite godi,

Alor acito piny wa i lobo ca, kama kiloro dog gange iwiya woko matwal.

Ento in i Rwot Lubangana,

idwoko kwona nia ki i bur.

7Ka kwona onongo tye ka a woko,

ci dong apo ikom Rwot:

ci legana owinye boti,

i Ot meri maleng.

8Jo ma giworo cal jogi mamwani,

gikwero bedo luwiny boti.

9Ento an abimiyi gitum mera ki dwon me pwoc;

gin ma dong atyeko kwongo pire bene abicobo.

Lar a ki bot Rwot.”

10Ci Rwot oloko ki rec, ci rec ongoko Yona woko iwi tera.