Yona 3

Yona owinyo dog Rwot ocito Nineve

1Lacen Rwot dok oloko bot Yona pi tyen me aryone, kun waco ni, 2“A icit Nineve ma en gang maditi, ci icit itit iye lok ma aciki pire.” 3Ci Yona oa ocito Nineve, kit macalo Rwot owace. Nineve onongo taun madit tutwal, ma ngolo dyere arii keken teri i wot me nino adek. 41Yona ocako donyo i taun madit meno, wote otere nino acel, ka odange kun waco ni, “Odong nino pyere angwen, ci Nineve gibiketo woko liweng.” 5Ci jo ducu me Nineve guye Lubanga; ka dok guciko bene pi kare me rii kec, kun guruku bongo cola, cake ki ikom jo madongo, o kwede wa ikom jo matino.

6Ka lok oo bot laloc me Nineve, ci en oa malo ki iwi komkere, ogonyo jore ki ikome, oruku bongo cola ka obedo kwede i buru. 7Dok laloc man omiyo lok oket oromo i dye Nineve ducu ni, “Pi cik pa laloc me Nineve ki luditone, pe dano mo, kadi lee, kadi dyang, kadi romo, obil gin mo; pe gucam, dok pe gumat pii. 8Ento wek dano ki lee kiumgi ki bongo cola, wek gukok matek bot Lubanga; i yo, wek ngat acel acel oloke owek kite maraci, ki bene timo tim aranyi ma en bedo katimone. 9Anga ma ngeyo? Gwok nyo Lubanga bijuku cwinye, ci biloke weko kinigane mageri, wek pe wato!”

10Ka Lubanga oneno gin ma jo man gutiyo, kit ma guloke kwede, guweko tim meggi maracu, Lubanga ojuku cwinye ikom gin marac ma onongo nene en owaco ni ebitimo ikomgi, ci pe dong otiyo.