Yona 4

Kiniga pa Yona ki kica pa Lubanga

1Kit ma Lubanga oloko ki tame ikom lwak me taun meno maditi, owango i Yona matek, omiyo kiniga omake adada. 21Ci Yona dok olego Rwot Lubanga, kun owaco ni, “Akwayi, in Rwot, man pe en aye gin ma nene alworo ikare ma onongo pud atye i lobona? Meno en aye obedo gin ma omiyo alwi woko oyotoyot me cito Tarcic; pien angeyo ni in Lubanga ma lakica, dok maro dano, kiniga bene pe maki oyot, mar meri ma pe loke ni dwong, in lagen mada, dok ijuku cwinyi pi timo rac bot lwaki. 32Koni dong in Rwot Lubanga, ikwany kwona woko ki ikoma, akwayi, pien bedo ber ka ato kato ma abedo kwo.” 4Ci Rwot ogame ni, “Itamo ni ber me in bedo ki kiniga?” 5Lacen Yona oa woko ki i Nineve, ci ocito ogero bolone me bedo kunu ki i tung kunyango me taun meno maditi; ci en obedo piny ite tipu bolone, wek kong enen gin ma bitime ikom taun man maditi.

6Ka dok Lubanga omiyo keno otwi odongo olak ka wi Yona, wek tipune ogeng ka wiye, pi kweyo ceng wek pe owange tutwal. Kumeno Yona cwinye obedo yom tutwal pi kenonu. 7Ento ka piny oru nino mukene, ci Lubanga omiyo kwidi ocobo kenonu, ci oner woko. 8Ikare ma ceng dong otuc, Lubanga omiyo yamo malyet okodo tutwal ki tung kunyango, ci ceng owango wi Yona nio ka kome oloc woko; omiyo Yona okwayo ni twora etoo, kun waco ni, “Bedo ber ka ato kato ma abedo kwo.” 9Ento Lubanga odok iye ki Yona ni, “Itamo ni ber me in bedo ki kiniga pi kenonu?” Yona ogamo ni, “Atamo ni ber me an bedo ki kiniga, kiniga ma roma to.” 10Rwot dok owaco ni, “Itye ka tamo pi keno ma in pe itiyo tic mo pireni, in aye pe imiyo odongo, ma otwi i dyewor acel ka dok oto woko i dyewor acel. 11An pe myero kica omaka pi Nineve ma en taun madit, matye iye jo makato alip miya acel ki pyere aryo ma pe gingeyo poko kin cinggi ma lacuc ki ma lacam, ki dok bene dyangi mapolgu?”