Mika 1

11

Man lok pa Rwot ma ceng omiyo bot Mika Lamorecet i ginanyuta ma en oneno ma okemo Camaria ki Jerucalem, ikare me loc pa jo magi: Yocam, Akaj, ki Kejekia, ma gubedo luker me Juda.

Wer me koko pi Camaria ki Jerucalem

2Wuwiny, wun rok ducu!

Wucik itwu wun jo ducu ma wubedo iwi lobo,

ki gin ducu matye iye,

wek Rwot Lubanga obed caden ma nyutu bal ikomwu,

kun loke winye ki i Ot mere maleng.

3Pien nen, Rwot tye kabino nia ki i kabedone,

en bibino piny, ci binyono wi cere ma otinge iwi lobo.

4Ci godi bileny ki i te tyene

macalo odok kic ma inget mac,

ci bimol bicore i lung,

macalo pii macore cito i lung.

5Magi ducu bitime pi tim aranyi ki pi tim me jemo pa Yakobo ki pi bal me ot pa Icrael. Anga ma omiyo jo pa Yakobo gujemo ikom Lubanga? Pe en aye taun madit me Camaria? Bal me ot pa Juda ma omiyo gudonyo kaworo cal apayani kono tye iwi nga? Pe iwi taun madit me Jerucalem? 6Pimeno Rwot waco kuman ni, “Abiloko Camaria doko obur ma i dye tim, dok bidoko kabedo me pito olok; dok abicoro gwengine piny i lung, ka dong abiyabo te gutine. 7Cal jogi apayagini ducu kibingidone woko matinotino; ki limgi ducu ma gucoko ma kiculugi pi bedo malaya ma i ot woro jogigi bene kibiwangogi woko ki mac. Pien jo Camaria guloke gudok kaworo cal jogi, pimeno lumerokgi dong bicoko gin ducu ma kiculugi pi malayagi ci gibiculu ki malaya me woro jogigi i lobo mukene.”

8Ci Mika dok owaco ni, “Pi man abikumu, dok abikok. Abiwot ki tyena nono kun nongo atye munero. Abikok calo too, dok abikumu macalo udu. 9Pien wang ret pa Camaria dong odoko tut ma pe twero cang, dok bene Juda bineno lakit can acelu; to dong otyeko o wa i dog cel pa jona, i dog cel me Jerucalem.”

Lamerok dong cok o i Jerucalem

10Pe wutit pire bot lumerokwa i Gat, pe wukoki wek dano pe gunge gin matye katime ikomwa; wun jo Bet-le-apra wungene piny i apwa me nyutu pi can ma opoto ikomwu. 11Wun jo Capir, wucit anyim i lobo ma pe mewu, kun wuwoto munero ma lewic omakowu marac; wun jo ma bedo i Jaanan pe wukat woko. Ka wuwinyo koko ma winye a ki i Bet-ejel man nyutuni kalarewu dong peke kunu. 12Jo ma bedo i Marot gitye kakuru gin maber ki par madwong, pien gin marac ma oa ki bot Rwot dong oo cok ki dog cel me Jerucalem. 13Wutwe aguragura ikom gadigadi lweny madwir, wun jo Lakic; pien wun aye jo mukwongo kelo bal ikom jo Cion, ki tim aranyi pa jo Icrael ceng kinongo ikomwu. 14Pimeno wubimiyo mot me poke bot Morecet-gat;2 odi me Akijib3 bidoko gin bwola bot luker me Icrael. 15Wun jo ma bedo i Mareca,4 dok abikelo ikomwu jo ma bwoyowu wek guma taunwu madito woko. Luker pa Icrael bicito kakane iboro me Adullam. 16Wun jo me Juda, wulyel yer wiwu woko kun wukumu pi lutino ma yomo cwinywu; wuwek wiwu otal woko macalo wi acut, pien kibimayo lutinowu woko ki botwu ci kibiterogi i opii.