Mika 2

Can ma bipoto ikom jo ma gidiyo lucan

1Gibineno can, jo ma gibedo ma wanggi twolo idye wor benebene pi yubu yub me timo gin marac, ma gipiro pi timo bal iwi kabutugi! Ka piny oru, ci gitimo, pien twerone tye i cinggi. 2Giparo poti pa dano, ci gigamo woko tektek ki bot wegine; giparo odigu kadok gimayogi woko; gidiyo dano ki bura, ci gimayo wa ode, kadi wa lobo ma oleyo ki bot wone.

3Pimeno Rwot owaco kuman ni, “Nen, atye kayubu lok marac ikom ot man, ma pe dok wubiwoto ngutwu ki iye; pe dok wubiwot kun wungate ki wake, pien kare meno bibedo kare marac.” 4Inino meno kibiwerowu ki wer me agec, dok bene gibikoko koko me can, kun giwaco ni:

“Kityekowa woko dong atika;

Rwot dong okwanyo lobo mayam opoko botwa woko

ci omiyo bot jo mukene.

En opoko potiwa woko ikin jo ma guterowa i opii.”

5Pimeno ka kare biromo me dwoko ngom botwu wun jo pa Rwot, ci pe tye ngat mo ikinwu ma kibimiye dul lobo mo me bedo mere.

6Dano gitito lok bota kun giwaca ni, “Pe itit lok meno ducu botwa, pe omyero itit kit lok macalo magi! Rwot pe bikelo lewic ikomwa matwal. 7Ento wun jo ot pa Yakobo, wutamoni kicenowu woko ce? Wun mono wutamoni Rwot pe twero diyo cwinye? Wun wutamoni magi ducu obedo gin ma en aye otiyo? Pe wungeyoni en loko lok me kica bot ngat ma tiyo gin matye atir?”

8Ento Rwot odok iye kuman ni, “Wun wutware ikom jona macalo lukwor. Ka lumony gudwogo ki i dog lweny ikom merok ki yomcwiny, kun gitamo pi kuc keken, ento gin dok girwate ki lulonyo ma gin gugamo banya ki botgi kun gipido banyagi ci gimayo kanyigi woko ki ikomgi. 9Wun wuryemo mon pa jona woko ki i odigi ma yomo cwinygini; ci wukwanyo wa gum pa lutinogi matino woko matwal ki botgi. 10Wua, dong wuciti, pien man pe kayweyo. Balwu dong omiyo kabedo man odoko rac dok opore me abala. 11Joni gimaro lanebi ma loko goba keken. En waco botgi ni, ‘Abititiwu ni kongo bwino ki mat mogo makec bibedo pol ata kany.’ Lanebi ma tye ki cwiny me goba aye biyomo cwiny jo man!

12Ento abicoko wun ducu, wun jo pa Yakobo, abicoko jo Icrael ma odong; ci abiguruwu kacel macalo romi matye i dwolgi, macalo lwak romi ma gitye i olet, lwak jo ma gin woo.”

13Lubanga biyabo yoo dok bitelo nyimgi; gibituru dog cel, ka gibikato woko. Rwotgi, ma en aye Lubangagi kikome aye bikato inyimgi, kun telo wigi.