Mika 3

Mika ojuku lutela pa jo Icrael

1Ci awaco ni, wuwiny, wun ludito ma telo wi jo pa Yakobo ki wun luloc me ot pa Icrael! Pe ticwu aye me ngeyo ngolo kop atir? 2Wun wukwero gin maber ento wumaro gin marac, wupwaco del kom jona, dok wudango ringo komgi ki ikom cogogi. 3Wun wucamo ringo kom jona, kun bene wuyango del komgi, dok wungido cogogi matitino, ka dong wungidogi woko macalo ringo ma kiketo i agulu, nyo macalo ringo ma tye i cupuriya. 4Kare tye kabino ma wubikok bot Rwot, ento en pe bigamo dogwu; inino maca pe wubineno wange, pien timwu racu tutwal.

5Man aye lok ma Rwot waco ikom lunebi ma gingako jone, ma gicike ni kuc bibedo ikom jo ma miyo botgi ginacama, ento giero lweny ikom jo ma gikwero miyogi ginacama. Rwot waco bot lunebi magi ni, 6“Wun lunebi, karewu dong tye cok mada; piny bibedo mutu botwu, pe wubineno ginanyuta mo, dok piny bidoko col kun pe wunongo lagam me gin mo. Ceng bipoto iwiwu, wun lunebi, piny bicido woko botwu.” 7Lewic bimako lunen piny, ki lutyet bene kibiketo lewic iwigi; gin ducu gibimiyo doggi woko, pien Lubanga pe bimiyo botgi lagam mo.

8Ento ki tung bota, atye ki tek i Cwiny pa Rwot, dok en miya cwiny me ngolo kop atir, ki teko, pi tito bene ki Yakobo tim aranyine, ki pi nyutu bot jo Icrael balgi. 9Wuwiny man, wun lutela wi jo pa Yakobo ki wun luloc me ot pa Icrael, ma wudag ngolo kop atir kun wubalo te kop ducu matye atir, 10ma wugero Cion ki lim ma wunongo ki tim me nek, ki Jerucalem bene ki tim marac. 11Lutela wi jo ma i Jerucalem gingolo kop pi lim me wil i mung, ajwakine bene gipwonyo pwony pi mucara, lunebi bene gitucu lok me nebi pi lim; ento dok pud gijenge ikom Rwot kun giwaco ni, “Ada Rwot tye ikinwa! Rac mo pe bibino ikomwa.” 121

Pimeno, pi tim mewu, Cion kibipuru woko macalo poto; Jerucalem bidoko obur, ki got ma kigero Ot pa Rwot iwiye bidoko bunga.