Mika 4

Rwot biloyo lobo ducu ki kuc

(Ica 2:2-4)

1Man bitime ikare ma pud tye anyim:

got ma Ot pa Rwot tye ocung iye,

bicung macalo got mabor makato godi ducu,

bore bikato cere ducu;

rok ducu gibimol gicito iye,

2dok lwak lurok mapol gibibino, ci gibiwaco ni,

“Wubin, waitu iwi got pa Rwot,

i Ot pa Lubanga pa Yakobo;

wek en opwonywa ki kit mere,

ka wek walub yone.”

Pien cik bia ki i Cion,

dok lok pa Rwot bia ki i Jerucalem. 31

En bingolo kop ikin rok mapol,

dok bingolo kop pa lwak rok matego ma gitye kamabor;

gibiteto pala lucwangi doko lak kweri dyang,

ki tongigi doko pala me ngolo jang olok;

rok mo pe bitingo pala lucwan ikom rok wadigi,

pe dong gibimede ki pwonyo lweny. 42

Dano acel acel bibedo ite olok ma mere ki ite odurune,

pe tye ngat mo ma bimiyo gibedo lwor;

pien dog Rwot me mony dong ociko lok man.

5Kadi rok ducu giwoto

kun ngat acel acel woto i nying lubangane,

ento wan wabiworo Rwot Lubangawa pi nakanaka.

Koko jo Icrael ki i opii

6Rwot owaco kuman ni, “Inino maca abicoko lungolo, dok abicoko jo ma kiryemogi woko, ki jo ma an kikoma dong atyeko unugi ki i lobo me opii. 7Abimiyo lungolo ma odong gidoko jo ma obwot, ki jo mayam kiryemogi gucito woko cen gin bidoko rok matek; abibedo lalocgi ki i got Cion nia ikare man nio wa inino ma pe tum.”

8In Jerucalem, In aye lubele ma Lubanga gwoko iye jone macalo lakwat ma gwoko dwol romine, dok in cere pa jo Cion, loci macon bidwogo i cingi, ma en aye ker pa jo Jerucalem. 9Gin ango ma omiyo itye kakok matek? Pingo icur acura ki arem macalo dako ma mwoc ogoyo ikare me nywal? Pe tye rwot mo ikinwu ce? Lumii tamwu dong guto woko ce?

10Wubed ki arem, kun wucur, wun jo Cion, macalo dako ma rem ki nywal; pien dong wubia woko ki i gang, wubibedo i tim ata; dok wubicito i Babilon. Rwot bilarowu ki kunu, en bilarowu ki icing lukworwu. 11Rok mapol dong gucoke ka lweny ikomwu, kun giwaco ni, “Wek wabal Jerucalem woko wek wanen kit ma Cion bidong obur kwede.” 12Ento gin pe gingeyo tam pa Rwot. Gin pe bene giniang yube ni en aye ocokogi me miyogi pwod macalo kidino kwede wit kal ma i laro moyo.

13Rwot waco kuman ni, “Wua malo wun jo Cion, wucit opot ikom lukworwu macalo twon dyang ma nyono wit kal me dinone, pien abimiyo tungwu doko calo nyonyo ki obong tyenwu bidoko calo mola. Wubingido rok mapol matinotino, wubidyero lonyogi ma gunongo i yo me geroni bota, an Rwot Lubanga me wi lobo ducu.”