Mika 5

1Wun jo Jerucalem wuwek mony mewu gucoke, pien dong kirumuwa woko dyere, lukworwa dong gurumuwa woko; dong gitye kagoyo lem laloc me Icrael ki odoo.

Lubanga ociko me cwalo laloc ma bia ki i Beterekem

21

Rwot waco kuman ni, “In Beterekem Eprata, in itidi mo pe ipore me bedo ikin kaka me Juda, ento dano ma bibedo laloc i Icrael bibino pi an kun a ki i in; ma tekwaro me kakane onongo tye ocake wacon i acaki piny.

3Pimeno Rwot biweko jone ata i cing lukworgi nio ka kare biromo, nio ka dako matye karem ki nywal dong onywalo wode. Lacen utmegine ducu ma gubwot ki ikin jo ma kiterogi i opii gibidwogo bot jo Icrael ma gudong. 4Ka en bibino, ci en bicung, dok biloyo jone pi tek pa Rwot, ki pi dit me nying Rwot Lubangane. Dok bene jone gibibedo ki kuc pien jo ducu ma iwi lobo gibiniang ikom dit ma mere 5ci en bikelo kuc.

Lar ki pwod

Ikare ma jo Aciria gibibino kamonyo lobowa, ma gin bituru cel gogowa woko, ci wan wabicwalo lutelawa ma gin oyita lweny katelo wi lwak ka lweny ikomgi. 62 Ci gibiloyo lobo me Aciria ki pala lucwan, ki lobo pa Nimulodi bene ki pala lucwan ma gitingo, ci gibilarowa ki i cing jo Aciria ka gubino gumonyo lobowa, kadi bed nongo tyen gi onyono apoki me wang lobowa.

7Lacen jo pa Yakobo ma gubwot gibibedo idye rok mapol macalo toyo ma oa ki bot Rwot, calo kot ma ngido ikom lum. Gin gibiketo gen gi ikom Lubanga, ento pe ikom dano adana. 8Jo pa Yakobo ma gudong ikin rok mapol gibibedo macalo labwor ma dwaro lee ma i bunga, onyo ma ikin romi ma gucoke; ma ka owok ki ikin romi, ci nyonogi piny, dok kilogi woko, dok bene pe tye ngat mo ma larogi. 9Icrael bitayo lukwore dok bityeko lumonene woko ducu liweng.”

10Rwot waco kuman ni, “Inino maca, abikwanyo aguragurawu woko ki botwu, dok abityeko gadigadi lweny mewu woko. 11Abityeko taun madito ducu ma i lobowu, dok abimuku cel gogo mewu matekgu woko ducu. 12Abikwanyo tim me tyetwu woko ki i cingwu, dok pe wubibedo ki lukota ikinwu. 13Abikwanyo cal apaya mewu ki wir jogi mewu matye ikinwu, dok pe wubimede ki gungu piny kaworo tic me cingwu. 14Abiputu wir ma wucomo woko ducu pi woro jok ma dako ma kilwongoni Acera, dok abibalo taun madito wu woko ducu. 15Dong pi akemo ki kinigana madwong, abiculu kwor ikom lurok mapol mayam pe guye winyo loka dok bene pe guye lubune.”