Mika 6

Adot ma Rwot tye kwede ikom jo Icrael

1Wuwiny lok me adot ma Rwot okelo ikom Icrael.

En waco ni, “Wua, wupid lokwu inyim godi, wek cere ducu owiny dwonwu.”

2Wun godi, wuwiny lok me adot ma Rwot okelo, ki wun guti me te lobo ducu ma rii nakanaka; pien Rwot tye ki lok me adot ikom jone, en bipido ki jo Icrael.

3Rwot Lubanga owaco kuman ni, “Wun jona, atimo gin ango ikomwu? Ceng amiyo wuol i gin ango? Wudoka iye! 41Pien ceng akwanyowu ki i lobo Ejipt, dok akokowu ki i ot me opii; kun acwalo Moses inyimwu kacel ki Aron ki Miriam bene. 52Wun jona, wupo lok ma Balak rwot me Moab oporo, ki gin ma Balaam wod pa Beor odoke iye, ki gin ma ceng otime nia i Cittim nio i Gilgal, wek wunge kit ma atiyo kwede pi larowu.”

Gin ma Rwot mito

6“Abibino inyim Rwot ki gin ango, ka wek agung inyim Lubanga matye malo? Abibino inyime mono ki gitum awanga, nyo ki roci me mwaka acel acel bo? 7Tika Rwot bibedo ki yomcwiny ikom nyogi romi alip ki alip, nyo ikom moo jeituni madwong marom ki pii ma opongo i kulu alip apar libyeny? Kece mono abimiyo latin kayona pi tim aranyina?” 8Pe, pe kumeno, Rwot dong onyuti gin maber, in dano; gin ma Rwot mito ki boti en aye timo tic manen atir, ki maro kica, ki wot kacel ki Lubangani ki mwolo.

9Rwot dange ki dwon malongo bot wegi taun, dok bedo me ryeko mada me lworo nyinge: “Wuwiny, wun kaka ki wun jo ma wucoke i taun maditi! 10Wiya pe twero wil ikom lonyo matye i ot pa dano ma latim marac, kacel ki lapim jami ma pe pimo pim kakare, ma cwinya dag nenone. 11Atwero weko dano matye ki mijan marac ma kicaane opong ki kidi me bwola ma pe bene pimo kakareni ningning? 12Jowu ma gulony gin jo mager mada dok giunu lucan; dok wun ducu bene wubedo jo ma lugoba keken. 13Pimeno dong acako pwodowu, kun awekowu wudong iwi obur ata pi balwu. 14Wun wubicamo cam, ento pe wubiyeng, kec binekowu; wubikano jami mogo ento pe wubigwoko, dok gin ma wugwoko abimiyo kibalo woko liweng ikare me mony. 15Wubicoyo kodi, ento pe wubikayo; wubiyo moo jeituni, ento pe wubitic ki moone; wubibiyo olok, ento pe wubimato kongo bwinone. 163Abitimo magi ducu ikomwu pien wulubu lakit tim maracu pa Omri, ki tic ducu me ot pa Akab; kun bene wulubu tamgi. Pieno abiweko taunwu madito bidong obur, ki jowu gibibedo me acaya, dok jo me rok ducu gibinenowu calo jo ma konygi bene peke woko liweng.”