Mika 7

Kit ma kwo pa jo Icrael obale kwede

1Dong aneno can! Pien aloke adoko macalo ngat ma kec neko ci ocito i poto olok ikare madong kityeko coko nyige woko calo yat me oro, ma dong kityeko gwero obot olok, ma nyige me acama mo dong peke, wa oduru mo ma okwongo cek ma cwinye mito pe dong tye. 2Pe tye ngat mo ma odong i lobo magene, dok bene pe tye ngat mo i lobo ma tiyo gin ma Lubanga mito. Dano ducu gitye kalibo luwotgi me aneka. Dano acel acel dwaro omine. 3Gin ducu gitye ki diro pi timo gin marac, gimito timone ki cwinygi ducu. Lutela ki lungolkop gipenyo pi lim me wil i mung. Dano madit tito miti marac matye i cwinye; kitmeno gipiro lok kacel pi timgi ducu wek orwate. 4Ngat maber ki ikin gi obedo calo ocok, ngat ma cwinye atir ki ikin gi obedo calo cel okutu.

Nino ma Lubanga biketo iye can ikomgi, macalo yam ociko bot lunebi ma lukurpiny ma meggi dong oromo. Kombedi dong gitye kacabe acaba dok tamgi onywene woko. 5Pe iket geni ikom lawoti, pe ibed ki gen ikom laremi; gwok dogi ikom ngat ma butu ikori; 61pien ikare man lutino co pe giketo deyo ikom wegigi, lutino anyira bene gipyem ki megigi, ciwod bene pyem ki daane; lukwor pa dano aye gin jo ma i ode.

7Ento ki tung bota abigeno Rwot, ma en lalar mera; Lubangana biwinya.

Rwot kelo lar

8Pe ium ikoma, in lakwora; ka apoto, dok abia; ka abedo i colpiny, Rwot bibedo dero ma menya. 9Abiciro kiniga pa Rwot, pien abalo inyime, nio wang ma en opido loka, kadok bimiya aloyo lok. En bikela i dero; ci abineno lar mere. 10Lakwora bene bineno, dok lewic bimako ngat mayam penya ni, “Rwot Lubangani tye kwene?” Abinene ki wanga ka kitye kanyone piny macalo coto matye i dye yoo.

11Wun jo Jerucalem, nino me gero cel gogo me taunwu bibino! Inino maca kibimedo wang lobowu cito kamabor. 12Inino maca jowu gibibino botwu nia ki i Aciria matye kunyango, ki Ejipt matye kupiny, dok nia ki i Ejipt nio i kulu Euprate, nia ki i nam, nio i nam, dok nia ki i got, nio i got. 13Ento lobo bidong nono pi bal pa jo ma gibedo iye, ki bene pi gin marac ma gin timo.

Kica pa Rwot ikom jo Icrael

14Kwa joni ki odooni, ai Rwot, ma gin romi ma kimiyi me bedo meri matwal, ma gibedo ken gi i bunga i dye lobo ma ceko cam; wek bene kikwagi i Bacan ki i Gilead macalo ikare macon.

15Rwot tii tic me tangoni ikinwa macalo ikare mayam ikelo wa kwede ki i lobo Ejipt. 16Lurok gibineno, dok lewic bimakogi ikom twer meggi ducu; ci gibiumu doggi ki cinggi; kun itgi biding woko. 17Gin biywane i apwa macalo twol, macalo jami ma mol iwi lobo; gibia ki i kabedogi ma kicelo matek, ma nongo komgi myel amyela, dok gibiloke bot Rwot Lubanga ki lworo madwong inyime.

18Anga ma dok Lubanga calo in, ma gonyo bal, ma weko bal pa jone kikome ma gudong? In pe imoko kinigani bedo matwal, pien cwinyi yom pi nyutiwa mar meri ma pe loke. 19In dok ibibedo ki kica ikomwa, in ibinyono balwa piny ite tyeni. Dok ibibolo balwa ducu piny i kut me nam. 20In ibinyutu gen bot Yakobo ki mar meri ma pe loke bot Abraim, macalo ceng ikwongo kwong bot kwariwa nia ikare macon.