Nakum 1

11

Man lok me nebi ma kicoyo ma okemo Nineve, ma Lubanga onyutu bot Nakum, dano me Elkoc.

Kiniga omako Rwot ikom Nineve

2Rwot en Lubanga ma lanyeko

dok en miyo pwod bot jo ma pe wore,

Rwot culu kwor kun tye ki akemo madwong;

Rwot culu kwor ikom lukwore dok kano akemone pi jo ma gin lumonene.

3Rwot kiniga pe mako oyot,

ento en tye ki tek madwong tutwal,

dok pe kwanyo kope woko ki ikom lubalo.

Yoo me wote tye i yamo lapiru ki i yamo kot,

pol obedo apwa me kor tyene.

4En juku nam, ci piine dwon woko,

en miyo pii ma i kulu ducu dwon woko.

Olet ma i Bacan two woko,

lum ma iwi got Karmel ner dok boke woko,

ki ature me Lebanon bene ner woko.

5Godi ducu yenge inyim Rwot,

cere gileny inyime.

Lobo yenge inyim Rwot,

lobo ki jo ducu ma gibedo iye komgi myel.

6Kace akemo omako Rwot,

anga matwero cung inyime?

Anga matwero ciro kinigane malyeti?

En onyo akemone calo mac,

dok muku gweng, ngido woko matinotino.

7Rwot gire ber,

en aye kakane pa jone ikare me can;

dok en gwoko jo ma giringo gilaro bote.

8Rwot jwero lukwore

calo lalele me pii ma mol ki teko madwong tutwal;

dok ryemo lumonene naka wa i colpiny.

9Wun wutye kapiro kit lok ango ikom Rwot?

En bityekowu woko liweng;

pe mite ni en ocul kwor kiryo ikom wun lukwore

dong en bigoyo wun tyen kicel keken.

10Lukwore bibedo macalo okutu ma okade woko liking, ci gibicato calo lumero ma gumato kongo bwino mapol.

Ci kibiwangogi woko macalo reng kal ma otwo.

11Wun jo Nineve, dano mo nene oa ki ikinwu, ma ceng opiro lok marac ikom Rwot, dok omiyo tam marac bot jo mukene.

12Rwot waco bot jone jo Icrael kuman ni, “Kadi bed jo Aciria gitek ma gidwong ningo, kibityekogi woko, dok nyinggi birwenyo woko matwal. Kadi bed yam aunuwu, pe dok abiunuwu aye. 13Kombedi dong abituru okol ma jo Aciria gurwako i ngutwu ci abicodo nyor ma gutweyo kwede tyenwu bene.”

14Man aye cik ma Rwot oketo pi jo Aciria: “Nyingwu pe dok biwinye matwal. Abijwero cal jogi apayawu woko liweng nyo cal jogi ma kicweyo ki i ot pa lubangawu, abiweko kineko wun woko ci abikwinyo bur lyel me yikowu, pien konywu dong peke. Wun pe opore me bedo kwo!” 152

Kong wunen, tyen ngat makelo lok maber tye iwi godi en tucu lok me kuc. Wun jo Juda, wukwer nino madito, dok wucob kwongwu, pien jo maracu pe dok gibimede kamonyowu, pien dong kijwerogi woko matwal.