Nakum 2

Poto pa Nineve

1Nineve, nen lanek piny tye kabino ikomwu.

Wugwok cel me gang maber; wubed kaneno yoo;

wutwe pyerwu ki del;

wubed ma dong bene wuyubu monywu pi lweny.

2(Rwot dong tye kadwoko deyo ki woro pa Yakobo ma en aye deyo ki woro me dit pa Icrael, macalo ikare ma luyak onongo peya oyako jamigi.)

3Lumerokgi ma gin twoni oteka lweny gumako kwot ma obok i cinggi,

acikarine ducu bene guruku bongo makwar.

Gadigadi lwenygi mil meny calo leb mac dok kiryeyogi i tyeng,

aguragura lwenygi dong gitye atera mada.

4Gadigadi lwenygi giringo ata idye yoo,

gimwome ki ngwec tungi ki tungi idyekal me gang;

gimeny lipilpil calo mac raa idye gudi,

gibedo kamil amila calo lutkot.

5Dong kityeko lwongo ludito ma giloyo lulweny,

gin dong gipange apanga ki wot me cito anyim.

Jo ma omonyogi girune gicito ikom cel gogo,

ma gumako kwot me lageng komgi.

6Dogcel ducu ma i dog kulu dong kiyabogi woko,

gangkal pa rwot opong ki lworo.

7Cal jok apayagi ma en dakeri bene kitero woko i opii,

dok angecane bene gitye kakok

ma gikumu akuma calo amam,

ma gidongo korgi ki cwercwiny.

8Dano bia ki ngwec madwir ki i Nineve macalo pii dam ma omuk,

ma piine mol liyekyek cito woko liweng.

Ludito me gang gibidange bot lukur piny ni, “Wucung ba! Wucung ba!”

Ento pe tye ngat mo ikin gi ma biloke dwogo cen ki ikin lwak ma giringo.

9Lukwor ma olwenyo ikomgi biwaco bot lukwor luwotgi ni,

“Wuyak ryal!

wuyak jabugu bene!

Lonyo ma kikano dwong ma pe tum i taun madit,

ki jami me wel mabeco ma yomo cwiny dano tye ma pe kwane.”

10Nineve dong kijwero woko odong obur!

Cwinygi poto kun conggi myel amyela,

arem dong omako dano ducu

wanggi ducu olwal woko!

11Dong taun madit man me Nineve ma obedo calo boro pa labwor tye kwene kaa?

En ma nene obedo calo ka kano cam pa lutino labwor,

kama yam labwor tero iye lee ma omako,

kama ceng lutinone bedo iye labongo ngat mo ma yelogi.

12Lumony ma i Nineve gubedo calo labwor ma gimako lee

ci gikilogi woko matinotino,

kun gipongo boro ki ringo lee ma gumakoni pi megi labwor ki pi lutinogi.

13Rwot me mony matwero ducu owaco kuman ni, “Nen, an abedo lakworwu, abiwango gadigadi lwenywu woko ducu, ci yitone biduny. Dok pala lucwan bene bityeko mony mewu woko liweng; ki dwon lukwenani bene dong pe biwinye matwal pi cwalo kwena mo bot rok mapat ni gumine kengi i te loc mewu.”