Nakum 3

1Can bipoto ikom taun madit ma oyo remo pa dano,

ma opong ki goba ki jami ma kiyako,

ma tim me yak pe gik ki iye ni!

2Kong wuwiny kit ma del anino cot kwede, ki mor pa lawala,

kit ma aguragura pye kwede,

kacel ki mor pa gadigadi ma giringo.

3Kong inen kit ma wegi aguragura gitye kangwec kwede,

ma nongo pala lucwangi meny amenya lipilpil,

ki tongigi bene ryeny aryenya!

Lwak dano ma kineko, komgi odure lipim;

dano ma oto welgi pe kwane,

dano woto ma giyoke ayoka ki kom jo ma oto!

4Nineve ma twon lakweleni dong kitye kapwodone,

en yomo cwiny co ki time me yatyat,

en aye makelo can ikom rok mapol pi time me kwele kweleni,

dok rwenyo jo mapol ki time me yatyat.

5Rwot me mony owaco ni,

“Nen, an dong abipwodo in Nineve,

abiwalo wa bongoni woko ki i pyeri aumu ki wii;

abimiyo lurok gineni ma dong itye munero,

ci lewic bimaki pien ker ducu bineni.

6Abinywano komi ki gin me kwer,

dok abitimo tim me cac ikomi wek rok gunge kit ma acayi kwede;

abimiyo dano giciko wanggi ikomi ki wur.

7Jo ducu ma bineni

gibijer woko ki boti kun giwaco ni,

‘Nineve odong obur;

anga mono ma bikumu pire?

En binongo jo ma kweyo cwinye ki kwene?’”

8Nineve in mono itamo ni iber ma ikato Tebec? Ma yam onongo taun madit matye inget kulu Nail, ma pii Nail orumu woko dyere, kun gwoke macalo cel mere. 9En yam oloyo Etiopia ki Ejipt, tekone onongo peke; Put ki Libya bene yam gubedo kakonyo en. 10Kadi bed kumeno, jo Tebec yam kiterogi woko, kiterogi woko i opii. Lutinone ducu kinekogi woko i agakigaki yoo; dok kibolo bene kwir pi luditogi ma giworo, jo madito ducu kitweyogi woko ki nyor.

11Nineve, in bene ibimer, dok ibibange woko; in bene ibiyenyo kapuce ki i cing lukwori. 12Cel gogoni ducu bibedo macalo yat oduru ma nyige pud cek aceka, ma ka kiyengo yate ci nyige poto piny i dog jo ma camo.

13Nen, lulwenyi girom ki mon mamwa. Dogcel me loboni kiyabo malac inyim lukwori, mac dong biwango rii me dog celi woko. 14Twom piini, dok iyub celi obed matek, lukwori gibibino girumi woko; pye i bur lobo inyon lobo, mak bao igo matapwali! 15Mac biwangi woko ki kunu, pala lucwan bene bitongi woko, kibityekowu macalo bonyo tyeko kwede cam.

Wunya wumede giwu calo bonyo. 16Wumedo lucatwilwu dong gudoko mapol ma gikato lakalatwe ma i polo. Ento gin birweny ata macalo bonyo, ma yaro bwome, ci tuk cito woko. 17Rwodiwu dong gipol macalo ocene, lulocwu bene gidwong calo lwak bonyo ma gicore iwi cel ikare ma koyo ngic. Ka ceng dong otuc, ci gituk gicito woko; ngat mo ma ngeyo kama gucito iye bene peke.

18In rwot me Aciria, lukwat guto woko, wa luditoni me awora bene dong gunino woko matwal. Lwaki guket woko ata iwi godi, ngat mo maromo cokogi kacel peke. 19Ret ma kiketo ikomi pe twero cang, wang bure odet marac tutwal. Jo ducu ma giwinyo lok ma ikomi gidongo cinggi ki yomcwiny pi gin ma otime ikomi. Tika ngat mo tye ma obwot ki itim bwamini ma onongo itiyo ma pe giki?