Kabakuk 1

1Man lok pa Lubanga ma pire tek ma Lubanga onyutu bot lanebi Kabakuk.

Kabakuk obako doge pi tim ma pe atir

2Ai Rwot, imito ni akok boti pi kare marom mene pi kony, yaka wek dong ilarwa? 3Pingo imiyo aneno tim maracu ma wanga neno tim aranyi? Topiny ki bwami guruma woko dyere, lweny ki daa tye i kabedo ducu. 4Cik dong odoko goro, ngolo kop ma atir bene dong peke. Jo maracu giloyo pido ikom jo ma kitgi atir, omiyo ngolo kop atir dong obale woko.

Lagam pa Rwot

51

Rwot Lubanga owaco ni, “Wungi ikin lurok ma orumuwu, wek kong wunen; ci wubibedo ki twon ur matek tutwal ka kitito ki wun. Atye katiyo tic mo ikarewuni ma pe wubiye ka kitito botwu. 62 Nen atye kakelo jo Kaldaya, en rok mager, matye kadore me bino, kun gingolo dye lobo arii, pi mako kabedo pa jo mukene ma pe meggi. 7Gin jo makelo lworo ki myelkom madwong; gitiyo ki awakagi ci pe giparo pi lubu cik pa rok mukene.

8Aguraguragi dwir makato kwac, giger makato orudi ma owor. Luring ki aguraguragi gia ki kamabor; aguraguragi gingweco ma gingwinyo ngom. Eyo, gituk oyotoyot macalo ocur ma lyane piny kaceyo came.

9Monygi ducu gucore magwa; dano acel acel bedo ki lworo marac ka ginyiko cok. Gimako opii ma welgi pe kwane calo nyig kweyo. 10Gingalo luker ducu, ginyero luloc kun gicayogi. Cel gogo mo ma gengogi peke, gin gitoro ngom ikomgi ci gimako woko oyot. 11Ci gikato woko oyot calo yamo ma kodo; ma gicito mere matwal; guloko tek komgi odoko lubangagi.”

Kabakuk dok obako doge bot Rwot

12Rwot, in ma ibedo tye nia i acaki piny! In Lubangana, in ngat maleng ma pe to. Ai Rwot, in yam iyero jo Babilon dok imiyogi tek; dok in Got, dong ityeko cikogi me pwodowa. 13Ento in wangi leng, pe imito neno gin marac, cwinyi dag neno jo ma gitimo dano marac. Ci gin ango kono ma omiyo iketo cwinyi kakanyo jo ma gungayo wangi wokoni, kun iling alinga ka jo maracu gineko jo ma kitgi atir makatogi?

14In imiyo kimako dano kadok kinekogi woko bene macalo rec me nam, onyo macalo gin ma gilak alaka ma rwotgi peke me telo wigi. 15Jo Babilon yutu dano woko ducu ki goli, macalo giywayo rec. Gin giywayogi woko ki obwo, ci gicokogi i ogwagi; yaka gicako myel ki yomcwiny pi makogi. 16Pimeno ka gin gumakowa, ci gityero gitum me woro jami lwenygi ma gutiyo kwede me makowa, ci dok giwango odok eceta me woro ogwagi. Gin giwaco ni jami lwenygi omiyogi lwak lonyo mapol, dok gitye ki cam me wel madwong.

17In mono ibiye ni gin jonu gumede ameda ki lweny ki pala lucwangi ce ikom rok mapol matwal? In mono ibiye ni gin jonu gutyek dano woko ce ki kit nek marac labongo kica?