Kabakuk 2

Lubanga ogamo lok pa Kabakuk

1An abicung iwi lubelena kun akuru lagam pa Rwot, abiito malo iwi lubele, ci abikuru wek awiny gin ma Rwot bitito bota, ki gin ma en bidok iye bota ma kemo nguruna.

2Ci Rwot omiya lagam man ni, “Coo gin ma ineno; coo maber ikom got ma apada matwero kwane maber, wek ngat ma kwano oniang iye oyotoyot. 31Ginanyuta man tye kuru kare ma Rwot ociko; en loko pi agiki kun goba mo peke iye, kare me cobone dong cok, tye kawot oyotoyot mada. Kadi bed nen ni bino motmot, bed ikur; kare man bibino ada, pe dok bigale. 42Nen, man aye kwena ma mako jo man: Gin jo ma cwinygi pe atir pe bikwo, ento ngat ma kite atir bibedo kwo pi niyene ikom Lubanga.”

Can bipoto ikom jo ma kitgi pe atir

5Jo ma giketo cwinygi ikom lonyogi gibwole ken gi. Jo ma gimaro lonyo gupong ki awaka dok cwinygi bene pe bedo ma opye mot. Gin luworo calo bur lyel; girom ki to ma pe yeng. Ma oweko gin gimito loyo rok ducu pirgi ken gi, wek gipinygi ducu gubed meggi. 6Ento kare dong onyiko cok ma jo ma kiloyogini gibiloko lok agec ikom jo Babilon, ma gingalogi ki lok makec kun giwaco ni, “Itye ki can, in ngat ma icoko gin ma pe meri ci iduru kacel lipim. Ibibedo ki jami ayaka pi kare marom mene? Pi kare marom mene ma ibidiyo lubanyani me culu limi?”

7Jo ma yam itiyo ki gero ikomgini gibia labongo ngeci ci gin bene gibidiyo in me culu banyani ki lwak magoba. Lumeroki gibibino ci gibimiyo komi myel matek atika. Ci in ibidoko ginayaka botgi. 8Pien yam iyako rok mapol atika, ento kombedi rok ma gubwote ducu gibiyako in, pi tim aranyini me neko dano ki tim me bwamini i lobo ma itimo ikom taun madito ki jo ducu ma gibedo i igi.

9Ibineno can, in ma inongo magoba ki bwami pi konyo ki jo ma meri, wek iger ki odi malo iwi cere, kama gin marac pe twero o iye boti! 10Ento in ikelo lewic ikom jo ma i odi, pien ineko rok mapol; omiyo ilanyo kwoni nono. 11Kadi wa godi ma kigero ki kom ot gibikok matek, ci bao me rii ot ducu gibigamo kokogi.

12Itye ki can, in ma igero taun madit kun ibedo ka oyo remo pa dano, ma iketo tegutine ki tim me bal! 13Rok ducu mayam iloyogi gin guolo komgi nono katiyo tic ma konye peke, dok gedo ducu ma gugero mac biwango woko. Rwot me mony aye otiyo man. 143Ento lobo bipong ki ngec me deyo pa Rwot macalo pii ma pong i nam

15Itye ki can in ma itoyo kinigani ikom luwoti, kun idiyogi ki tek wek gumato lwak kongo mapol ci gumer woko ka dong giwoto ma gicato, in imiyo ginen calo lumero, wek inen munerogi!

16Ibibedo ki lewic madwong ma ka bedo ki deyo. In kikomi aye myero imati, ka wek ipange ki wot! Rwot aye bimiyo imato ki kikopo me pwodi, ci deyoni biloke doko lewic. 17Bwami ma ityeko timone ikom bunga me Lebanon bene kibitimone ikomi ci biumi woko lipuk; dok nek ma ineko ki lee tim ma bedo iye, in bene lee tim bimiyi lworo madwong. Man bitime ikomi pi bedo laneko ki latim bwami ikom lobo, ki ikom taun madito ki jo ducu ma gibedo i igi.

18Cal jok apaya tye ki kony ango? En gin ma dano opayo, cal nyonyo mamwa, ma pwonyo mere goba keken. Konyo ango ka lapa cal jok keto gene ikom gin ma en otiyo? En cal lubanga matye ki dog ento pe twero loko gin mo. 19Itye ki can, in ma iwaco ki cal yat ma ipayo ni, “Coo woko!” Ki dok bot got ma pe lokoni, “A malo!” Cal meno twero nyutu kit gin ango bot ngat mo? Nen, kideyo kome ki jabu ki ryal, ento aluu me yweyo pe tye i iye wa ki acel.

20Ento Rwot tye i Ot mere maleng; wek jo ducu ma i lobo guling mot inyime.