Kabakuk 3

Lega pa Kabakuk

1Man aye lega pa lanebi Kabakuk:

2Ai Rwot. Atyeko winyo pi gin ma itiyo,

tici ma itiyo omiya twon lworo ki myelkom.

Dok itii aye ikarewa

tic madito mayam ibedo katiyogi ikare ma okato,

wek tici ongene ikarewa.

Bed lakica kadi bed kiniga maki.

3Lubanga dok tye kabino ki i Teman,

Ngat Maleng tye ka a ki iwi got Paran.

Derone oryeny umu polo woko,

lobo ducu opong kipak me deyone.

4En bino maryeny calo ceng,

dero wil a ki i cinge;

en kano twerone kunu.

5En cwalo two gemo inyime,

ka dok ociko to me lubu kore.

6Ikare ma ocung, lobo oyenge;

ka oneno piny, rok ducu komgi omyel.

Godi ma girii nakanaka gumuk woko liweng,

ki cere ma bedo matwal gilwiny gidok gidonyo piny,

ki cere yoo ma en yam woto iye ikare macon odoko apyel.

En aye ma bedo kwo nakanaka!

7Aneno kema pa jo Kucan tye ki can,

ki jo Midian komgi gumyel.

8Rwot, akemo mono onongo omaki ikom kulu?

Kinigani onongo tye ikom kulu bo?

Gwok nyo ibedo ki akemo ikom nam ba,

ikare ma iringo ki aguragurani,

ki iwi gadigadini ma ikelo loc bot joni?

9Dong ityeko yube me telo atumi me celo piny,

kidok juruni opong ki atero madwong.

Imiyo lutkoti omeny obaro i lobo.

10Ka godi guneni, ci guyenge matek,

pii ocako mol ki lalele marac tutwal;

pii matut ma ite lobo omor matek,

wa biamwonyine ducu oile malo adada.

11Pi dero me ateroni ma dong ibayogi,

ki wil pa tongi maryeny tutwali

Ceng ki dwe gucung mot i kabedogi.

12Idore i dye lobo ki akemo magwa,

ki kiniga magwa inyono rok woko piny.

13Icito ka lweny pi laro wan joni,

ki pi laro rwoti ma dong i wiro.

Inginyo wi latela pa jo maracu woko kun iweke odong munero cake ki i eme wa i ngute, ci ityeko bene jo ma lube ducu liweng.

14Itiyo ki aterone me ocobo wi latela pa lulwenye pa merok wa woko,

ma onongo gubino macalo yamo lapiru ma gimito ketowa woko,

gupong ki yomcwiny madwong kun gimito neko lucan woko i mung.

15Inyono nam ki aguragurani,

kun ingolo ki i dye pii matek ma twage gunye agunya.

16Ka awinyo man, ci koma myel marac,

del doga bene omyel pi lworo.

Cogona ducu ongo odoko calo pii keken,

anongo tyena myel amyela ka awoto.

Atye kakuru nino me can mot

en nino ma bibino ikom jo ma gilwenyo ikomwani.

17Kadi bed yat oduru pe gituru,

ki olok bene pe ginyak;

kadi bed yat jeituni bene dong pe twero ceko gin mo

ki poti ducu pe dong ceko cam;

kadi bed romi ma i dwol kityekogi woko

ki dyangi bene dong peke i dwol,

18pud abibedo ki wake pi Rwot,

abinyate ki yomcwiny madwong pi Lubanga Lalara. 191

Lubanga, ma en Rwot, aye tek mera;

en miyo tyena bedo yot calo tyen til,

en bigwoka ka awoto iwi ceregu.