Jepania 1

11

Man lok pa Rwot mayam obino bot Jepania wod pa Kuci, wod pa Gedalia, wod pa Amaria, wod pa Kejekia ikare pa rwot Yocia me Juda, wod pa Amon.

Nino ma Rwot bingolo iye kop

2Rwot owaco ni, “Abijwero jami ducu ki iwi lobo. 3Abijwero dano wa ki leegu ducu; abijwero winyo me polo wa ki rec me nam bene. Abityeko jo maracu woko ducu; dok abineno ni dano maracu dong kinekogi woko liweng ki iwi lobo. 4Abiryeyo bada ikom Juda, ki ikom jo ducu ma gibedo i Jerucalem pi pwodogi; dok abijwero jo pa Baal ma gudonge woko ducu ki i kabedo man, wa ki nying ajwaki ma gitiyo bot cal jogini wi dano bene biwil woko ikomgi. 5Dok bene abityeko jo ma ryebe piny iwi ot kaworo ceng, dwe, ki lakalatwer; ki jo ma giryebe piny ka kwongo kwong i Ot pa Rwot ma kun nongo kono bene gikwongo kwongo i nying lubanga Milkom bene. 6Abityeko jo ma gudok woko cen, ma pe gilubu an Rwot, gin jo ma pe yenyo wanga nyo penyo kony ki bota nyo pe gipenyo doga wek anyut botgi gin ma gutim.”

7Wuling mot inyim Rwot Lubanga! Pien nino pa Rwot dong tye cok; Rwot dong otyeko yube me tyero jone, dong olwongo merok me balo Juda woko. 8Rwot owaco ni, “Inino me tyero gitum, abiketo can ikom luloc ki ikom lutino pa rwot ki ikom jo ducu ma gilubu kit pa lurok mukene. 9Inino meno abiketo can ikom jo ducu ma giworo lubanga Dagan kun nongo gikalo larii dogola, gin jo ma gitimo tim bwami ki loko lok goba i ot me woro jogigi.

10Inino meno, koko biwinye ki i Dogcel me Rec, koko me can biwinye ki i but taun madit me Aryo, mor piny madwong biwinye ki iwi cere. 11Wukok can, wun jo ma wubedo i Pany2! Pien lucatwil dong gipeke, jo ma pimo ryal dong kityekogi woko. 12Ikare meno abingiyo Jerucalem ki mac tara, abiketo can ikom jo ma gibedo abeda mot ma cwinygi okwe, jo ma giwaco ki i cwinygi ni, ‘Rwot pe bitiyo gin maber, dok pe bitimo gin marac.’ 13Jamigi kibiyako woko, odigi bene kibiketogi woko. Kadi bed guger odi, pe gibibedo i igi; kadi bed gupit olok, pe gibimato kongo bwinone.”

14Nino madit pa Rwot dong tye onyiko cok, tye cok dok tye kabino oyotoyot; dwon me nino pa Rwot, dwon magwar, dano matek kok iye ki dwon malongo. 15Nino meno aye nino me akemo, nino me can ki me remcwiny madwong, nino me nginyo ki me balo piny, nino me colpiny ki mutu, nino me pol ki colpiny mapek, 16nino me kutu tum ki woo me lweny ikom taun madito ma kicelo matek, ki ikom cel ma kigero maboco.

17Rwot owaco ni, “Abikelo can ikom dano, ma bimiyo giwoto calo lutowang, pien gubalo inyim Rwot; kibionyo remogi woko i ngom ma pyete macalo apwa, ki ringo komgi kibibolo calo cet.”

18Kadi ryalgi nyo jabugi pe bilarogi inino me akemo pa Rwot. Mac me akemo me nyekone biwango lobo ducu; en bityeko dano ducu ma gibedo i lobo ma kicel dok oyotoyot.