Matayo 28:20

Yecu ocer

(Mar 16:1-8; Luk 24:1-12; Jon 20:1-10)

1Ka ceng Cabit dong okato, ikine me okokgweno me nino mukwongo me Cabit, Maliam Lamagdala ki Maliam mukene gucito kaneno lyel. 2Ento oyengyeng madit oyengo piny; pien lamalaika pa Rwot olor ki ipolo obino piny ci ongilo got woko ki i dog lyel, ka obedo iwiye. 3Lamalaika meno onongo nen calo lutkot ma wil, ki ginarukane onongo nen matar calo pee. 4Pi lworo en omiyo lukur piny komgi omyel, ci gudoko calo jo ma oto. 5Ento lamalaika owaco bot mon meno ni, “Pe wulwor; pien angeyo ni wutye kayenyo Yecu mayam kiguro ikom yatariya ni. 6Pe tye kany, pien ocer woko kit macalo nene en owaco. Wubin wunen kama onongo en obutu iye. 7Ci wucit oyotoyot wutit bot lupwonyene ni en dong ocer woko ki ikin jo ma oto, nen, en dong okwongo nyimwu me cito i Galilaya; wun wubinene ki kunu. Nen, dong atyeko tito botwu.”

8Ci gua woko ki iwi lyel oyotoyot ki lworo ki yomcwiny madwong, guringo gucito katito bot lupwonyene. 9Ento nen, Yecu orwate kwedgi, ci omotogi ni, “Wutye ba!” Gin gubino bote gumako tyene ci guwore. 10Ka dok Yecu owaco botgi ni, “Pe wulwor; wucit wutit bot utmegina ni myero gucit i Galilaya, ci gibinena ki kunu.”

Lok ma lukur piny gudwoko

11Ikare ma mon magi gitye kawot, jo mogo ki ikin lukur piny gudok i taun madit ka dwoko lok bot ajwaki madito pa Lubanga pi gin ducu madong otime ni. 12Ka dong gucoke kacel ki ludongo, madong guporo lok, ci gumiyo lim madit bot acikari. 13Ci guwaco ni, “Wuwac bot lwak ni, ‘Lupwonyene gubino ki dyewor ci gukwalo kome ikare ma onongo wanino woko.’ 14Kace laloc biwinyo lok man, ci wan wabiniange ki lok ducu, wek can mo pe opot ikomwu.” 15Acikari gugamo lim ci gutimo kit macalo kicikogi kwede. Ma omiyo lok man obedo ka ywek ikin Lujudaya nio wa onyo.

Yecu onyute bot lupwonyene

(Mar 16:14-18; Luk 24:36-49; Jon 20:19-23; Tic 1:6-8)

161

Ikare meno lupwonyene apar wiye acel gucito i Galilaya, iwi got mayam en ociko gi ni gucit iye. 17Ka gunene ci guwore; ento jo mogo gubedo ki akalakala. 18Yecu obino ci owaco botgi ni, “Twero ducu ma iwi polo ki i lobo dong kityeko miyo woko bota. 192 Pimeno dong wucit wucilok jo me rok ducu gudok jo maluba, kun wubatijagi inying Won ki Wod ki Cwiny Maleng. 20Wupwonygi me gwoko gin ducu madong atyeko cikowu kwede. Nen, atye kwedwu kare ducu, nio i agiki piny.”