Marako 1

Tito lok pa Jon Labatija

(Mat 3:1-12; Luk 3:1-18; Jon 1:19-28)

1Man aye Kwena Maber ma mako kom Yecu Kricito, Wod pa Lubanga. 21 Kwena ne cake kit ma kicoyo kwede i buk pa lanebi Icaya ni,

“Nen, abicwalo lakwenana bitelo nyimi,

ma bigero yoni. 32

Dwon dano mo ma dange ki i tim ni,

‘Wuger yo pa Rwot,

wutir yone ocung atir.’”

4Kitmeno, Jon Labatija onen i tim, kun batija dano dok bene tito lok ni; “Wungut wek ki batijawu, wek Lubanga owek balwu.” 5Jo mapol ma i lobo Judaya ducu ki jo mapol ma i Jerucalem gucito bote. Gutucu balgi, ci en obatijagi i kulu Jordan. 63

Jon onongo ruku bongo ma kiyubu ki yer kinaga, ka tweyo pyere ki del, kun camo bonyo ki moo kic ma i tim. 7En obedo katito lok kun waco ni, “Tye dano mo ma obibino kun lubu kora makato an ki dit, ma an pe aromo gungo piny ka gonyo del war tyene. 8An abatijawu ki pii, ento en bibatijawu ki Cwiny Maleng.”

Jon obatija Yecu

(Mat 3:13-17; Luk 3:21-22)

9Ikare meno Yecu oa ki i Najaret matye i Galilaya obino bot Jon, ci Jon obatija en i kulu Jordan. 10Ka Yecu oa woko ki i pii, otugi neno ka polo yabe, ki Cwiny Maleng ka tye kabino kun lyane piny macalo akuri ci opye ikome. 114 Ci dwon ocako winye ma a ki i polo kun waco ni, “In aye i Woda ma amaro, ma cwinya yom ikomi.”

Catan obito Yecu

(Mat 4:1-11; Luk 4:1-13)

12Cutcut Cwiny Maleng otero Yecu woko wa i tim. 13Ci en obedo i tim nino pyere angwen kun lumalaika gubedo ka konye. Catan ocako bite, ikare meno ma en onongo tye i tim ikin lee me tim.

Yecu ocako tice i Galilaya

(Mat 4:12-17; Luk 4:14-15; Jon 4:1-3,43)

14Ikare ma kimako Jon kitweyo i buc, Yecu ocito i Galilaya kun tito lok me Kwena Maber ma a ki bot Lubanga; 155 kun waco ni, “Kare dong oromo, ker pa Lubanga onyiko cok; wungut, wuye lok me Kwena Maber.”

Yecu olwongo lucik rec angwen

(Mat 4:18-22; Luk 5:1-11)

16Ka Yecu onongo woto rabo dog nam me Galilaya, ci oneno Cimon ki omine Anderiya, ka gitye ka bolo obwo recgi i nam; pien gin lumak rec. 17Yecu olwongogi ni, “Wubin wulub kora, ci an abimiyowu wudoko lumak dano.” 18Ci cutcut gutugi weko obwogi, gulubu kore. 19Ka dok guwoto anyim manok, ci oneno Yakobo ki omine Jon, gin awobe pa Jebedayo, ma onongo gitye i yeya ka tudu wang obwo recgi. 20En otugi lwongogi, ci cutcut gin bene guweko won gi Jebedayo odong ki lutice i yeya, gucako lubu kore.

Dano matye ki cen

(Luk 4:31-37)

21Gucako cito wa i Kapernaum, ci cutcut i ceng Cabit Yecu ki lupwonyene odonyo i kacoke, ci ocako pwonyo lwak. 226 Dano guuru kit pwonye matek, pien opwonyogi macalo won twero, pe macalo Lupwonycik. 23Ci cutcut dano mo matye ki cen otugi nen i kacoke; 24ocako dange matek ni, “Ilaro gin ango kwedwa kaa, in Yecu Lanajaret? Dong ibino ka tyekowa bo? An angeyi, in i dano maleng pa Lubanga.” 25Ento Yecu ojuke, kun waco ni, “Ling mot, a woko ki ikome!” 26Cen marac ojake ki koko matek, ka oa woko ki ikome. 27Dano ducu guuru matek, kun gipenye keken gi ni, “Man gin ango? Man aye dok kit pwony manyen bo? Nen en ka ciko wa cen maracugu ki twero, ci gin bene giwinyo doge” 28Ci pire oywek oromo kabedo ducu murumu lobo Galilaya.

Yecu ocango maro pa Cimon Petero

(Mat 8:14-15; Luk 4:38-39)

29Ci cutcut gua woko ki i kacoke, gudonyo i ot pa Petero ki Anderiya, gunywako wot kacel ki Yakobo ki Jon. 30Maro pa Petero onongo tye ki two lyeto, obutu piny, ci cutcut gutito pire bot Yecu. 31Yecu ocito omako cinge otinge kwede malo, ci two lyeto ocang woko ki ikome, ka ocako gwokogi.

Yecu ocango jo mapol i otyeno

(Mat 8:16-17; Luk 4:40-41)

32Ki i otyeno ma ceng dong opoto, gucako kelo bote lutwo ducu ma komgi lit, ki jo ma cen omakogi. 33Jo ducu ma i taun madit gucoke i dogola. 34Ci Yecu ocango lutwo mapol ma onongo gitye ki kwa two mapatpat, kun ryemo ki lwak cen mapol; pe oye cen mo oloko, pien onongo gingeye.

Yecu otito lok i Galilaya

(Luk 4:42-44)

35Odiko con ma piny pud col, Yecu oa malo, ci opuk ocito woko wa i kabedo kama dano peke iye, ci obedo kalego Lubanga kunu. 36Cimon ki jo ma gitye kwede gucako lubu kore; 37ka gunonge ci guwaco ni, “Dano ducu gitye ka yenyi.” 38En Yecu ogamo doggi ni, “Dok wakobu woko i taun madito mukene matye cok ki kany, wek acit atit lok kunu bene; pien meno en aye gin ma omiyo abino.” 397 Ci Yecu owoto orumu lobo Galilaya ducu, kun woto ki tito lok i kacokegi ki ryemo cen mapol bene.

Yecu ocango ladobo

(Mat 8:1-4; Luk 5:12-16)

40Ladobo mo obino bot Yecu, kun orumu conge piny obako doge bote, ci olege ni, “Ka i mito, itwero canga.” 41Ci kica omako Yecu ikome, ocako ryeyo cinge ogudu kome, kun waco ni, “Amito; komi ocang.” 42Ci cutcut dobo ocang ki ikome, kome odoko leng. 43Yecu ocike matek, ka ocwale kwede ocito. 448 Ocike ni, “Winy ba, pe icitit ki dano mo; ento ber icit ci inyute keni bot ajwaka pa Lubanga, wek imii gityer pi komi madong ocangi, kit mayam Moses ociko, wek obed lanyut botgi.” 45Ento en ocito, ocako tito loke atyer bot lwak, ci loke oywek. Pieno omiyo Yecu pe dong twero donyo i taun mo kamaleng; ocako bedo i kabedo ma dano peke iye, ento lwak gumol gucito bote ma gua ki i kabedo ducu.