Marako 2

Yecu ocango dano matye ki two akweya kom

(Mat 9:1-8; Luk 5:17-26)

1Ka nino okato manok, Yecu odwogo i Kapernaum, ci pire owinye ni en tye paco. 2Ci lwak gucoke kacel, ma kabedo odoko ding, ma pe romogi. Ot opong wa i dogola; kun en obedo katito lok botgi. 3Jo mogo gukelo bote dano ma twoyo two akweya kom. Co angwen aye onongo gutingo en. 4Ka yoo me tere inyim Yecu oloyogi pi lwak, ci guyabo wi ot ki malo ma opime ki kama Yecu tye iye. Ma gutyeko mukune ci gucwalo kitara ma latwo obutu iye piny inyime. 5Ikare ma Yecu oneno niyegi, ci owaco bot latwo ni, “Latina, bali dong kiweko woko.”

6Cutcut Lupwonycik mogo, ma onongo gin tye kunu, gubedo ka pyem keken gi wa i cwinygi ni, 7“Dano man loko kuman pingo? En oyeto Lubanga! Anga matwero weko bal kono ngat acel keken, en aye Lubanga?” 8Oyotoyot Yecu ocako niang ki i cwinye kene ni gitye ki pyem ma kitmeno i cwinygi. Ci en openyogi ni, “Pingo cwinywu tye ka pyem i lok macalo man? 9Lok mayote tye kwene ka awaco bot latwo ni, ‘Bali dong kiweko woko’, kono nyo ni, ‘Aa malo wek iting kabutuni, icit wa paco’? 10Ento kombedi abinyutu botwu ni Wod pa dano tye ki twero me weko bal iwi lobo.” Ci cut owaco bot latwo akweya kom ni, 11“An awaco ni, a malo, iting kabutuni, icit giri paco.”

12En ocako a malo, otingo kabutune oyotoyot, ocito woko ki inyimgi. Man omiyo gin ducu guuru tutwal. Gucako pako Lubanga kun giwaco ni, “Ma naka yam peya waneno kit gin macalo man.”

Yecu olwongo Levi

(Mat 9:9-13; Luk 5:27-32)

13Yecu dok ocito i dog nam Galilaya; ci lwak ducu gubino bote, ocako pwonyogi. 14Ka okato i yoo, ci oneno Levi, wod pa Alipayo, ka obedo piny ka jogo mucoro, ci owace ni, “Luba.” Ci oa malo, olubu kore.

15Ingeye cutcut Yecu obedo piny i ot pa Levi. Lujog mucoro ducu ki lubalo gubino gubedo piny kacel ki lupwonyene. Jo mapol ma kitmeno onongo gubedo ka lube. 16Lupwonycik ma ikin Luparicayo, ka guneno ni en tye ka cam kacel ki lubalo ki lujog mucoro, gupeny lupwonyene ni, “Pingo en camo kacel ki lujog mucoro ki lubalo?”

17Yecu owinyo ci ogamo ni, “Jo ma komgi yot pe gimito daktar, pe abino kalwongo jo ma kitgi atir, ento lubalo.”

Peny ikom rii kec

(Mat 9:14-17; Luk 5:33-39)

18Lupwonye pa Jon ki pa Luparicayo onongo gitye ka rii kec. Jo mogo gubino gupenye ni, “Pingo lupwonye pa Jon ki pa Luparicayo giri kec, ento lupwonyeni pe giri kec?” 19Yecu odok iye botgi ni, “Lurem lanyom twero rii kec ma kun lanyom tye kwedgi? Pi kare ducu ma lanyom tye kwedgi pe gitwero rii kec. 20Ento kare bibino ma gibikwanyo lanyom woko ki botgi, ka dong gibiri kec ikare meno. 21Pe tye ngat mo ma dabo bongo manyen ikom ginaruka ma otii. Ka otimo kitmeno, ci kiraka ma gidabo kwede ni telo bongo meno; en manyen ni jung woko ki kom ma otii, ci wang bongo yec mede. 22Pe tye ngat mo ma piko kongo bwino manyen i opiru macon; ka opiko, ci kongo meno biyeco opiru woko, kongo bio woko, ki opiru bene bibale. Ento kongo bwino manyen myero kipik i opiru manyen.”

Lapeny ma mako ceng Cabit

(Mat 12:1-8; Luk 6:1-5)

231

I ceng Cabit mo Yecu obedo kawot kun ngolo ki dye poto ngano, ma gitye kawot, lupwonyene gucako rito wit ngano. 24Luparicayo gupenye ni, “Pingo lupwonyeni gitiyo gin ma cik okwero ni pe giti i ceng Cabit?” 252 En odok iye botgi ni, “Wun pe wukwano gin ma Daudi otiyo ikare ma kec neke marac, en ki jo matye kacel kwede? 263 Kit ma en odonyo kwede i Ot pa Lubanga ikare ma Abiatar aye ajwaka madit pa Lubanga? Ocamo mugati ma giketo inyim Lubanga, mayam Cik okwero ni dano mo pe ocam, kono ajwaki pa Lubanga keken. Daudi ocamo, dok opoko ki jo matye bote.” 27Ci Yecu otito botgi ni, “Ceng Cabit giketo pi dano, pe dano aye giketo pi ceng Cabit. 28Kumeno Wod pa dano aye Rwot me ceng Cabit.”