Marako 3

Labade otal

(Mat 12:9-14; Luk 6:6-11)

1Yecu dok odonyo i kacoke, kama onongo tye iye laco mo ma bade otal. 2Gukiye ka nyo bicange i ceng Cabit, wek gikel lok ikome. 3Yecu owaco bot labade otal ni, “A malo icung idyere.” 4Ci openyogi ni, “I ceng Cabit, Cik ye ni kitim iye gin maber nyo gin marac, gilar iye kwo nyo ginek woko?” Ento gin guling alinga. 5En olworo wange ikomgi ki kiniga, cwinye ocwer pi nwang cwinygi. Owaco bot laco meno ni, “Rye badi.” Labade otal oryeyo bade ci bade ocang cut. 6Luparicayo gukato woko, cutcut gucako poro lok kacel ki jo pa Kerode kit ma myero gineke kwede.

Lwak gucoke i dog nam

7Yecu ki lupwonyene gua gucito i dog nam. Lwak madwong ma gua ki i Galilaya gulube ki jo ma gua ki i Judaya, 8ki i Jerucalem, ki Idumea ki loka Jordan, ki i lobo ma orumu Turo ki Cidon. Lwak madwong gucoke bote, pien guwinyo pi tic mapol ma en otiyo. 91 En ociko lupwonye ni guyub yeya matidi pire, wek pe lwak gubed ka diyo en. 10Pien onongo ocango jo mapol, ci oweko dano ducu ma komgi lit gudiine ikome kabonge. 11Ka cen guneno, ci guryebe inyime, ki koko kun giwaco ni, “In giri Wod pa Lubanga.” 12Yecu ojukugi ni pe omyero guwek dano ongeye.

Yecu oyero Lukwena apar wiye aryo

(Mat 10:1-4; Luk 6:12-16)

13Yecu oito malo iwi got, ocako lwongo jo ma en mito ni gubed bote. Gin gucito bote. 14Ocako yero jo apar wiye aryo wek gubed kacel kwede, dok wek eorgi gubed lukwena me tito lok, 15dok gubed ki twero me ryemo cen. 16Mukwongo Cimon ma en ocako nyinge Petero; 17ki Yakobo wod pa Jebedayo, ki Jon omin Yakobo, ma en ocako nyinggi ni Boanergi, ma te loke ni, jo ma gimor calo kot; 18ki Anderiya ki Pilipo ki Bartolomayo ki Matayo, ki Tomaci, ki Yakobo wod pa Alipayo, ki Tadayo, ki Cimon ma obedo ikin jo ma gimito locken, 19ki Juda me Keriot, mayam oloke odobe.

Yecu ki Beeljebul

(Mat 12:22-32; Luk 11:14-23; 12:10)

Ma Yecu odok paco, 20lwak dok gucoke, omiyo en ki lupwonyene pe gitwero nongo kare me cam. 21Ma jo tugi guwinyo, ci gubino ka make pien giwaco ni, “En opo woko.” 222 Lupwonycik ma gua i Jerucalem guwaco ni, “En tye ki jok Beeljebul,” dok ni, “En ryemo cen pi twero pa ladit pa cen.” 23Yecu olwongogi bote, oloko kwedgi i carolok ni, “Catan twero ryemo Catan ningning? 24Ker ka opoke iye aryo, ker meno pe twero cung. 25Dok ot ka iye opoke aryo, ot meno pe twero cung. 26Dok ka Catan ocako lweny ikome kekene ce opoke kene, ci pe twero cung, kerne gik woko. 27Ento pe tye ngat mo matwero donyo i ot pa dano ma kome tek ka yako jamine; ento kong kwongo tweyo dano ma kome teki, ka dong biyako jamine ma i ode. 28Adada awaco botwu ni, bal ducu ma dano timo, ki lok ducu ma giyeto kwede Lubanga, gibiwekone woko, 293 ento ngat ma yeto Cwiny Maleng pe kibiweko bale matwal, pien nongo otimo bal ma rii nakanaka.” 30Yecu oloko man pien onongo gin guwaco ni, “En tye ki cen.”

Min Yecu ki omegi Yecu

(Mat 12:46-50; Luk 8:19-21)

31Mine ki omegine gubino, gucung woko, gucwalo kwena me lwonge. 32Lwak onongo gubedo kun gurume dyere. Guwaco bot Yecu ni, “Nen, meni ki omegi gitye woko, kayenyi.” 33En openyo ni, “Maa ki omega gin angagi?” 34Olworo wange ikom jo ma gurume ma gubedo piny, ci owaco ni, “Maa ki omega gin ene. 35Dano ma tiyo gin ma Lubanga mito, en aye omera, ki lamera, ki maa.”