Marako 4

Carolok ikom lacokodi

(Mat 13:1-9; Luk 8:4-8)

11

Yecu dok ocako pwony i dog nam. Lwak madwong tutwal gucoke bote; pimeno en odonyo iyeya, obedo piny i iye ki i dye nam, lwak ducu gubedo iwi tura. 2Opwonyogi ki lok mapol i carolok. I pwonye en owaco ni: 3“Wuwiny! Lacokodi ocito ka coyo kodi. 4Ka kun coyo, kodi mogo okir i yoo, winyo gubino, gucamo woko. 5Kodi mukene okir ikom pata kama ngom tye iye manok. Cutcut gutwi, kama ngome pe tut. 6Ka ceng oryeny, owangogi gutwo woko, pien lwitgi pe odonyo matut. 7Kodi mukene okir ikin okutu, okutu olot odiyogi woko, pe gunyako nyiggi. 8Kodi mukene okir i ngom maber, gutwi, gujany, gunyako nyiggi, mukene pyere adek, mukene pyere abicel, mukene miya.” 9Yecu odolo loke kun waco ni, “Ngat matye ki it me winyone, owiny.”

Pwony ikom carolok

(Mat 13:10-17; Luk 8:9-10)

10Ikare ma Yecu odong kene, ci jo murume dyere kacel ki jone apar wiye aryo ni, gubino gupenye lok ikom carolok meno. 11En ogonyo botgi tere ni, “Wun gimiyowu ngec me ngeyo mung me ker pa Lubanga, ento bot jo mukene ma gitye woko kiloko kwedgi i carolok, 122 wek ka gineno, gunen, ento pe guniang maber, dok ka giwinyo, guwiny, ento pe guniang tere maber; wek pe guloke gudwog cen bot Lubanga, owek balgi.”

Yecu otito te carolok ikom lacokodi

(Mat 13:18-23; Luk 8:11-15)

13Yecu openyogi ni, “Pe wuniang te carolok man? Wubiniang ningning carolok ducu? 14Lacoo kodi coyo lok pa Lubanga. 15Kodi ma okir i yoo, meno aye jo ma winyo lok pa Lubanga, ka guwinyo, cutcut Catan bino, kwanyo lok ma kicoyo i igi woko. 16Kitmeno kodi ma okir i ngom ma obedo pata; gin aye jo ma giwinyo lok, oyotoyot gimako lok ki yomcwiny; 17ento pe gitye ki lwitgi igi, giri pi kare manok; ka can obino, nyo libo dano ocake, pi lok meno, cutcut gipoto woko. 18Kodi mukene ma okir ikin okutu; gin aye jo ma giwinyo lok, 19ento paro lok me lobo man, ki maro lonyo, ki miti me jami mukene, ka odonyo i cwinygi ci diyo gi, pe ginyak. 20Ento kodi mukene ma okir i ngom maber ni, gin aye jo ma giwinyo lok, ci gigamo, ginyako nyiggi, mukene pyere adek, mukene pyere abicel, mukene miya.”

Mac tara ma kiumu ki aduku

(Luk 8:16-18)

213

Lacen Yecu openyogi ni, “Tara mono kikelo i ot me auma ki aduku, nyo me aketa ite kitanda? Pe kicibo kamalenge iwi lacib tara? 224 Pien pe tye gin mo ma okane ma pe bingene, kadi gin ma kiumu ma pe binen kamaleng. 23Ka ngat mo tye ki it me winyone, owiny.” 245

Ci dok owaco botgi ni, “Wugwoke ikom lok ma wuwinyo. Lapim ma wupimo kwede jami, en aye kibipimo ki megwu bene, dok kibimedone botwu. 256 Pien ngat ma gire mo tye, kibimede, ngat ma gire mo pe kibikwanyo woko ki bote kadi wa gin ma en tye kwede ducu.”

Carolok ikom twi pa kodi

26Yecu owaco ni, “Ker pa Lubanga tye kit man, macalo dano ma coyo kodi i ngom. 27En butu piny i dyewor, dok a i dyeceng, ci kodi cako twi, dongo, kun en pe ngeyo kit ma time kwede. 28Ngom kene aye miyo kodi nyako nyige; mukwongo kong twi, lacen ngok, ka nyige core. 297 Ento ka bel ocek, ci dano cako kayone cut, pien nongo kare me kac dong oromo.”

Carolok ikom kodi karadali

(Mat 13:31-32; Luk 13:18-19)

30Dok owaco ni, “Wabiporo ker pa Lubanga ki kit gin ango? Nyo wabinyutu ki kit carolok ango? 31Ker pa Lubanga rom ki kodi karadali; ka kicoyo i ngom, kadi bed en tidi tutwal makato kodi ducu ma iwi loboni, 32ento ka kicoyo, ci dongo, doko dit makato yadi ducu, jange jany madito, miyo winyo me polo gigero odigi ite tipu jange.”

33Otito botgi lok i carolok mapol calo meno, kit ma gitwero niang kwede. 34Pe oloko kwedgi labongo carolok, ento ka en tye ki lupwonyene, ci gonyo telok ducu botgi.

Yecu ojuku yamo i nam

(Mat 8:23-27; Luk 8:22-25)

35Inino meno ma piny dong oyutu, Yecu owaco botgi ni, “Wakatu loka ca.” 36Guweko lwak, ci gukwango en ki yeya ma onongo en tye iye ni; ki yeya mukene bene onongo tye kacel kwedgi. 37Yamo madwong ocako kodo, pii otwage, ocore i yeya, omiyo i yeya ocako pong woko. 38Ento en onongo tye i yeya itung i ngeye, kun onino ikom laten wic. Gucoye, guwaco ni, “Lapwony, in pe iparo? Nen, wato woko do.” 39En ocako co woko ci ojuku yamo, owaco ki nam ni, “Ling, pye mot.” Yamo ocako kwe, nam oling litik. 40Openyogi ni, “Pingo wulwor kit man? Wun pe wutye ki niye?” 41Gubedo ki lworo madwong, ci gucako penye keken gi kun giwaco ni, “Man anga kaa, ma yamo ki nam giwinye ni?”