Marako 5

Yecu ocango dano matye ki cen i Geraca

(Mat 8:28-34; Luk 8:26-39)

1Gin guo i loka nam tungcel, i lobo pa Lugeraca. 2Ka Yecu okato woko ki i yeya, ci cutcut dano mo matye ki cen obino bote, ma oa ki i kabedo kama kiyiko iye jo ma oto. 3En onongo bedo ikin lyel, pe tye dano mo matwero tweyo en kadi ki nyor; 4pien yam kitweye tyen mapol ki atego ki nyor, ento ocodo nyor, oturu atego woko. Pe onongo tye dano mo matye ki kero ma loye. 5Nino ducu, dyewor ki dyeceng, en bedo ikin lyel ki iwi cere kun kok, dok ngolo kome kekene ki kidi. 6Ka oneno Yecu ki kamabor, ci oringo, oryebe inyime, owore. 7Ci odange ki dwon malongo ni, “Ilaro ango kweda, Yecu Wod pa Lubanga Mamalo Twal? Akwonge ki nying Lubanga, pe iyela.” 8Pien onongo ocike ni, “A woko ki ikom dano man, in cen.” 9Yecu openye ni, “Nyingi anga?” Ogamo ni, “Nyinga Legion, pien wapol.” 10En obako doge bote matek ni, pe omyero ocwalgi woko ki i lobo meno. 11Lwak opego mapol onongo gitye ka cam i kor got kunu; 12gubako doggi bote kun giwaco ni, “Cwalwa i opego, wek wadony igi.” 13Yecu oye ki gin. Cen marac gua ki ikome, gudonyo i opego, lwak opego ma gimito romo ka alip aryo, gutware ki ngwec gucore i longo got, gumwony woko i nam.

14Lukwat guringo gutito loke i taun madit, ki ikin paco. Dano mapol gumol gubino kaneno gin ma otime. 15Gubino bot Yecu, guneno laco mayam tye ki cen. Obedo piny, oruku bongo, odoko ryek, en mayam onongo tye ki dul mony me cen ni. Piman lworo ocako makogi. 16Jo ma guneno gutito botgi lok ducu ma otime ikom dano mayam tye ki cen ikomeni, ki gin ma otime ikom opego ni. 17Gubako doggi bot Yecu ni myero oa woko ki i lobo tugi.

18Yecu ka dong tye kaito i yeya, ci dano mayam tye ki cen ikomeni obako doge bot Yecu ni myero ebed bote. 19Ento Yecu okwero woko, owaco ni, “Dok paco bot lutuwu, i cit itit gin madit ma Rwot otimo ikomi, ki kit ma otimi kwede kica.”

20En ocito, ocako tito lok madit ma Yecu otimo ikome i Dekapoli,1 omiyo jo ducu guuru.

Nya pa Yairo ki dako ma ogudu dog bongo pa Yecu

(Mat 9:18-26; Luk 8:40-50)

21Ka Yecu dong okato loka nam tung ca, lwak madwong gucoke bote; en obedo i dog nam. 22Ngat acel ma ikin ludito me kacoke ma nyinge Yairo obino; ka onene, ci oryebe piny katyene, 23obako doge bote matek ni, “Nyara matidi cok to woko. Bin iket cingi ikome wek ocang, obed makwo.” 24Yecu ocito kacel kwede, kun lwak madwong gilube, kun gidiye. 25Onongo tye dako mo madong otwoyo two agoba mwaka apar wiye aryo. 26En olimo can madwong ki bot ludaktar mapol; olanyo lime ducu ma pe okonye ento twone mede ameda. 27Ka owinyo lok ikom Yecu, obino ki i ngeye ki ikin lwak, ci ogudu dog ginarukane; 28pien otamo ni, “Ka agudu kadi kom ginarukane keken, ci abicang.”

29Oyotoyot two agobine ocang woko, ci ongeyo ki ikome kene ni dong ecang woko ki i two ne. 30Ka Yecu ongeyo ki ikome ni teko oa ki ikome, ci oloke i dye lwak cut, openyo ni, “Anga ma ogudu ginarukana?” 31Lupwonyene gugamo ni, “Ineno lwak tye ka diyo in, ka dok pud ipenyo ni, ‘Anga ma oguda?’” 32Ci olworo wange wek enen ngat ma ogudeni. 33Ci dako meno, ka ongeyo kit gin ma otime ikome, obino bot Yecu ki lworo, kun kome myel, oryebe inyime, otite lok ducu me ada. 34Yecu owace ni, “Nyara, niye ni ocangi. Wot ki kuc, two ni dong otyeko cang matwal.”

35Ka Yecu pud loko, jo mogo gubino ma gua ki i ot pa ladit me kacoke, guwaco ni, “Nyari dong oto woko, pud dok iyelo Lapwony pingo?” 36Yecu pe oketo cwinye ikom lok ma guwaco, ento ociko ladit me kacoke ni, “Pe ilwor, in iye meri ayeya keken.” 37Pe oye dano mo olube, kono nyo Petero ki Yakobo ki Jon omin Yakobo keken. 38Gubino i ot pa ladit me kacoke, Yecu oneno lwak ma giwoo, kun gikok ma gidange matek. 39Ka odonyo i ot, ci openyogi ni, “Pingo wuwo ki koko? Latin man peya oto, ento onino anina.”

40Gunyere matek, ci Yecu oryemogi ducu woko, ocako tero won latin ki mine ki jo ma onongo gitye kacel kwede, gudonyo kama latin tye iye. 41Omako cing latin nyako, owaco ni, “Talita kum,” ma teloke ni, “Latin anyaka, awaco ni, a malo.” 42Oyotoyot nyako oa malo, owoto, pien onongo mwaka me dite dong romo apar wiye aryo. Guuru matek tutwal. 43Yecu ocikogi matek ni ngat mo pe myero onge lok man; ka dong ocikogi ni gimi ki nyako ni gin acama mo ocam.